ഇറാനിൽ പ്രക്ഷോഭകാരികൾക്കെതിരെ കടുത്ത നടപടി; സ്വത്തുക്കൾ കണ്ടുകെട്ടാൻ ഉത്തരവ് | Iran Unrest

ടെഹ്‌റാൻ: രാജ്യത്ത് നടന്നുവരുന്ന സർക്കാർ വിരുദ്ധ പ്രക്ഷോഭങ്ങളിൽ പങ്കെടുത്തവർക്കും അവരെ പിന്തുണയ്ക്കുന്നവർക്കും എതിരെ കടുത്ത ശിക്ഷാ നടപടികളുമായി ഇറാൻ ഭരണകൂടം (Iran Unrest). പ്രക്ഷോഭകാരികളെ 'കലാപകാരികൾ' എന്ന് വിശേഷിപ്പിച്ച ജുഡീഷ്യറി മേധാവി ഗുലാം ഹൊസൈൻ മൊഹ്‌സേനി-ഇജെയി, ഇവർക്കെതിരെയുള്ള യഥാർത്ഥ നടപടികൾ തുടങ്ങുന്നതേയുള്ളൂ എന്ന് മുന്നറിയിപ്പ് നൽകി. പ്രക്ഷോഭത്തിനിടെ ഉണ്ടായ നാശനഷ്ടങ്ങൾ പരിഹരിക്കുന്നതിനായി പ്രതിഷേധക്കാർക്കും അവരെ പിന്തുണച്ചവർക്കും അയച്ച നോട്ടീസുകൾക്ക് പുറമെ, ഇവരുടെ സ്വത്തുക്കൾ കണ്ടുകെട്ടാനുള്ള നടപടികളും അധികൃതർ ആരംഭിച്ചു കഴിഞ്ഞു.

പ്രതിഷേധങ്ങളെ പിന്തുണച്ച പ്രമുഖ ബിസിനസുകാരുടെ ആസ്തികൾ, കഫേകൾ, പ്രമുഖ ഫുഡ് ബ്രാൻഡുകൾ എന്നിവ ഇതിനകം തന്നെ കണ്ടുകെട്ടിയതായി റിപ്പോർട്ടുകളുണ്ട്. ഇതിന് പുറമെ, പ്രക്ഷോഭത്തിൽ പങ്കെടുത്ത 'തെറ്റിദ്ധരിക്കപ്പെട്ട' വ്യക്തികൾക്ക് തങ്ങളുടെ തെറ്റ് സമ്മതിച്ച് കീഴടങ്ങാൻ മൂന്ന് ദിവസത്തെ സമയം അനുവദിച്ചിട്ടുണ്ട്. ഇത്തരക്കാർക്ക് ശിക്ഷയിൽ ഇളവ് നൽകുമെന്നും എന്നാൽ അല്ലാത്തവർക്കെതിരെ യാതൊരു ദയയുമില്ലാത്ത നടപടികൾ സ്വീകരിക്കുമെന്നും പോലീസ് മേധാവി അഹമ്മദ് റെസ റദാൻ വ്യക്തമാക്കി. ഇതേസമയം, രാജ്യത്തുടനീളം ഇന്റർനെറ്റ് വിച്ഛേദിച്ചിരിക്കുന്നത് തുടരുകയാണ്.

ഇറാനിലെ സ്ഥിതിഗതികളെക്കുറിച്ച് അമേരിക്കൻ പ്രസിഡന്റ് ഡൊണാൾഡ് ട്രംപ് നൽകിയ മുന്നറിയിപ്പുകൾ രാജ്യത്ത് വലിയ നയതന്ത്ര പ്രതിസന്ധിക്ക് കാരണമായിട്ടുണ്ട്. പ്രക്ഷോഭകാരികളെ കൊല്ലുന്നതിനെതിരെ ട്രംപ് ശക്തമായ ഭാഷയിൽ പ്രതികരിച്ചിരുന്നു. എന്നാൽ ഇത് ഇറാന്റെ ആഭ്യന്തര കാര്യങ്ങളിലുള്ള ഇടപെടലാണെന്നും പരമോന്നത നേതാവ് ആയത്തുള്ള അലി ഖമേനിക്കെതിരെയുള്ള നീക്കങ്ങൾ വൻ പ്രത്യാഘാതങ്ങൾ ഉണ്ടാക്കുമെന്നും ഗാർഡിയൻ കൗൺസിൽ മുന്നറിയിപ്പ് നൽകി. പ്രക്ഷോഭങ്ങളിൽ ഇതുവരെ അയ്യായിരത്തോളം പേർ കൊല്ലപ്പെട്ടതായാണ് അനൗദ്യോഗിക കണക്കുകൾ സൂചിപ്പിക്കുന്നത്.