ടെഹ്റാൻ: അമേരിക്കൻ സൈന്യം ഇറാനെതിരെ ആക്രമണം നടത്തിയാൽ മധ്യേഷ്യൻ രാജ്യങ്ങളിലെ യുഎസ് സൈനിക താവളങ്ങൾ തകർക്കുമെന്ന് ഇറാൻ ഭരണകൂടം കർശന മുന്നറിയിപ്പ് നൽകി (Iran Unrest). സൗദി അറേബ്യ, യുഎഇ, തുർക്കി, ഖത്തർ തുടങ്ങിയ അയൽരാജ്യങ്ങളെയാണ് ഇറാൻ ഈ വിവരം ഔദ്യോഗികമായി അറിയിച്ചത്. പ്രക്ഷോഭകർക്ക് പിന്തുണ പ്രഖ്യാപിച്ചു കൊണ്ട് അമേരിക്കൻ പ്രസിഡന്റ് ഡൊണാൾഡ് ട്രംപ് സൈനിക ഇടപെടലിന് സാധ്യതയുണ്ടെന്ന് സൂചന നൽകിയതിന് പിന്നാലെയാണ് ഇറാന്റെ ഈ നീക്കം.
ഖത്തറിലെ അൽ ഉദൈദ് വ്യോമതാവളം ഉൾപ്പെടെയുള്ള കേന്ദ്രങ്ങൾ തങ്ങളുടെ മിസൈൽ പ്രഹര പരിധിയിലാണെന്ന് ഇറാൻ ഓർമ്മിപ്പിച്ചു. ഇറാൻ വിദേശകാര്യമന്ത്രി അബ്ബാസ് അരാഗ്ചി യുഎഇ, ഖത്തർ, തുർക്കി എന്നിവിടങ്ങളിലെ അധികൃതരുമായി ചർച്ചകൾ നടത്തിവരികയാണെങ്കിലും അമേരിക്കയുമായുള്ള എല്ലാ നേരിട്ടുള്ള നയതന്ത്ര ബന്ധങ്ങളും ഇറാൻ നിലവിൽ വിച്ഛേദിച്ചിരിക്കുകയാണ്.
അതേസമയം, ഇറാനിലെ ആഭ്യന്തര പ്രക്ഷോഭങ്ങളിൽ കൊല്ലപ്പെട്ടവരുടെ എണ്ണം 2,600 ലേക്ക് ഉയർന്നതായാണ് റിപ്പോർട്ടുകൾ സൂചിപ്പിക്കുന്നത്. ഇതിൽ 2,400-ലധികം പ്രക്ഷോഭകരും സുരക്ഷാ ഉദ്യോഗസ്ഥരും ഉൾപ്പെടുന്നു. പ്രക്ഷോഭങ്ങളുമായി ബന്ധപ്പെട്ട് അറസ്റ്റിലായ ഇരുപത്തിയാറുകാരനായ ഇർഫാൻ സുൽത്താനിയുടെ വധശിക്ഷ ബുധനാഴ്ച നടപ്പാക്കുമെന്ന് മനുഷ്യാവകാശ സംഘടനകൾ ആശങ്ക പ്രകടിപ്പിക്കുന്നുണ്ട്. രാജ്യത്ത് ഇതുവരെ പതിനെണ്ണായിരത്തിലധികം ആളുകളെ സുരക്ഷാ സേന തടവിലാക്കിയിട്ടുണ്ട്. പ്രക്ഷോഭകരെ തൂക്കിലേറ്റിയാൽ ശക്തമായ സൈനിക നടപടി ഉണ്ടാകുമെന്ന് ട്രംപ് ആവർത്തിച്ചു വ്യക്തമാക്കിയിട്ടുണ്ട്. ഇറാനുമായി വ്യാപാര ബന്ധം പുലർത്തുന്ന രാജ്യങ്ങൾക്ക് 25 ശതമാനം താരിഫ് ഏർപ്പെടുത്തുമെന്ന ട്രംപിന്റെ പ്രഖ്യാപനം ചൈന ഉൾപ്പെടെയുള്ള രാജ്യങ്ങൾക്ക് വലിയ തിരിച്ചടിയാകും. നിലവിലെ സംഘർഷാവസ്ഥ കണക്കിലെടുത്ത് ഇറാനിലുള്ള തങ്ങളുടെ പൗരന്മാരോട് ഉടൻ രാജ്യം വിടാൻ അമേരിക്ക നിർദ്ദേശിച്ചു കഴിഞ്ഞു.
Iran has warned Middle Eastern neighbors that U.S. military bases on their soil will be targeted if Washington intervenes in the ongoing domestic unrest. As the death toll nears 2,600 and over 18,000 people are detained, President Donald Trump has vowed "strong action" and urged protesters to seize state institutions. Amidst a complete internet blackout and the pending execution of 26-year-old Erfan Soltani, tensions have reached a boiling point with the U.S. advising its citizens to evacuate Iran immediately.