മോസ്കോ: പാശ്ചാത്യ രാജ്യങ്ങളുടെ ഉപരോധങ്ങൾക്കിടയിലും ബഹിരാകാശ ഗവേഷണ രംഗത്ത് വലിയ മുന്നേറ്റവുമായി ഇറാൻ (Iran Space Program). റഷ്യയുടെ സഹായത്തോടെ തദ്ദേശീയമായി നിർമ്മിച്ച മൂന്ന് ഉപഗ്രഹങ്ങൾ കൂടി ഇറാൻ വിജയകരമായി ഭ്രമണപഥത്തിലെത്തിച്ചു. ഞായറാഴ്ച (ഡിസംബർ 28, 2025) റഷ്യയിലെ വോസ്റ്റോക്നി കോസ്മോഡ്രോമിൽ നിന്ന് 'സോയൂസ്' (Soyuz) റോക്കറ്റിലായിരുന്നു വിക്ഷേപണം.
പായ (Paya), സഫർ-2 (Zafar-2), കൗസർ 1.5 (Kowsar 1.5) എന്നീ ഉപഗ്രഹങ്ങളാണ് വിക്ഷേപിച്ചത്. ഇതിൽ പായ ഇറാൻ ഇതുവരെ നിർമ്മിച്ചതിൽ വെച്ച് ഏറ്റവും ഭാരമേറിയതും (150 കിലോ) അത്യാധുനികവുമായ ഇമേജിംഗ് ഉപഗ്രഹമാണ്. നിർമ്മിത ബുദ്ധി (AI) സാങ്കേതികവിദ്യ ഉപയോഗിച്ച് പ്രവർത്തിക്കുന്ന ഈ ഉപഗ്രഹം കൃഷി, പരിസ്ഥിതി നിരീക്ഷണം, ജലവിഭവ മാനേജ്മെന്റ് എന്നിവയ്ക്കായി ഉയർന്ന വ്യക്തതയുള്ള ചിത്രങ്ങൾ നൽകും. സഫർ-2, കൗസർ 1.5 എന്നിവയും നിരീക്ഷണ ആവശ്യങ്ങൾക്കായി സർവ്വകലാശാലകളുടെയും സ്വകാര്യ മേഖലയുടെയും സഹകരണത്തോടെ നിർമ്മിച്ചവയാണ്.
കഴിഞ്ഞ രണ്ട് വർഷത്തിനിടെ ഇറാൻ നടത്തുന്ന പത്താമത്തെ ഉപഗ്രഹ വിക്ഷേപണമാണിത്. റഷ്യയും ഇറാനും തമ്മിലുള്ള തന്ത്രപരമായ ബന്ധം ബഹിരാകാശ രംഗത്തും ശക്തമാകുന്നതിന്റെ സൂചനയാണിത്. എന്നാൽ, ഇറാന്റെ ഉപഗ്രഹ വിക്ഷേപണങ്ങൾ ബാലിസ്റ്റിക് മിസൈൽ സാങ്കേതികവിദ്യയുടെ വികാസത്തിന് സഹായിക്കുമെന്ന് അമേരിക്കയും യൂറോപ്യൻ രാജ്യങ്ങളും ആശങ്ക പ്രകടിപ്പിക്കുന്നുണ്ട്. എന്നാൽ തങ്ങളുടെ ബഹിരാകാശ പദ്ധതികൾ പൂർണ്ണമായും സമാധാനപരമായ ആവശ്യങ്ങൾക്കുള്ളതാണെന്ന് ഇറാൻ ആവർത്തിച്ചു വ്യക്തമാക്കി.
Iran achieved a significant milestone in its space program by successfully placing three domestically developed satellites into orbit using a Russian Soyuz rocket. The trio, including the 150kg 'Paya'—Iran's heaviest satellite to date—was launched from the Vostochny Cosmodrome for environmental and agricultural monitoring. This mission highlights the growing strategic and technological partnership between Tehran and Moscow amid ongoing Western sanctions and concerns.