അബുദാബി: പതിറ്റാണ്ടുകളായി നിലനിൽക്കുന്ന ആണവ തർക്കം പരിഹരിക്കുന്നതിന് അമേരിക്കയുമായി ഒരു സമാധാനപരമായ ആണവ കരാറിൽ ഏർപ്പെടാൻ ഇറാൻ ആഗ്രഹിക്കുന്നുവെന്ന് ഇറാൻ ഡെപ്യൂട്ടി വിദേശകാര്യ മന്ത്രി സയീദ് ഖതിബ്സാദെ പറഞ്ഞു. എന്നാൽ ദേശീയ സുരക്ഷയിൽ വിട്ടുവീഴ്ച ചെയ്യില്ലെന്നും സയീദ് ഖതിബ്സാദെ വ്യക്തമാക്കി.
ആണവായുധങ്ങൾ നിർമ്മിക്കാനുള്ള കഴിവ് നേടുന്നതിനായി ഇറാൻ തങ്ങളുടെ ആണവ പദ്ധതിയെ മറയാക്കുകയാണെന്ന് യുഎസ്, യൂറോപ്യൻ സഖ്യകക്ഷികൾ, ഇസ്രായേൽ തുടങ്ങിയ രാജ്യങ്ങൾ ആരോപിക്കുന്നത്. എന്നാൽ തങ്ങളുടെ ആണവ പദ്ധതി സമാധാനപരമായ ആവശ്യങ്ങൾക്ക് മാത്രമാണെന്ന് ഇറാൻ ആവർത്തിച്ചു. അബുദാബി സ്ട്രാറ്റജിക് ചർച്ചയിൽ സംസാരിക്കവെ, യുഎസ് ആണവ ചർച്ചകൾ സംബന്ധിച്ച് മൂന്നാം രാജ്യങ്ങൾ വഴി ഇറാനിലേക്ക് പരസ്പര വിരുദ്ധമായ സന്ദേശങ്ങളാണ് അയക്കുന്നതെന്ന് ഖതിബ്സാദെ ആരോപിച്ചു.
അമേരിക്കയും ഇറാനും അഞ്ച് റൗണ്ട് ആണവ ചർച്ചകൾ നടത്തിയിട്ടുണ്ട്. എന്നിരുന്നാലും, ജൂണിൽ ഇറാനും ഇസ്രായേലും തമ്മിലുള്ള 12 ദിവസത്തെ യുദ്ധത്തിനുശേഷം ചർച്ചകൾ സ്തംഭിക്കുകയായിരുന്നു. യുദ്ധസമയത്ത് ഇറാന്റെ പ്രധാന ആണവ കേന്ദ്രങ്ങളെ ആക്രമിച്ചുകൊണ്ട് യുഎസ് "നയതന്ത്രത്തെ വഞ്ചിച്ചു" എന്ന് അദ്ദേഹം കൂട്ടിച്ചേർത്തു. ഇറാൻ ആണവായുധങ്ങൾ നിർമ്മിക്കാനുള്ള സാധ്യത തടയുന്നതിനായി ഇറാന്റെ യുറേനിയം സമ്പുഷ്ടീകരണം പൂർണ്ണമായും നിർത്തണമെന്ന അമേരിക്കയുടെ ആവശ്യം ഉൾപ്പെടെയുള്ള പ്രധാന വിഷയങ്ങളിൽ ഇരുപക്ഷത്തിനും ഇപ്പോഴും അഭിപ്രായവ്യത്യാസങ്ങൾ തുടരുകയാണ്.
അതേസമയം, കഴിഞ്ഞയാഴ്ച, ഇറാന്റെ വിദേശനയത്തിലും ആണവ പദ്ധതിയിലും അന്തിമ തീരുമാനമെടുക്കുന്ന പരമോന്നത നേതാവ് ആയത്തുള്ള അലി ഖമേനി, ഭീഷണിയുടെ വെളിച്ചത്തിൽ യുഎസുമായുള്ള ചർച്ചകൾ തള്ളിക്കളഞ്ഞു. എന്നിരുന്നാലും, "ഇറാൻ ആണവ ബോംബുകൾ തേടുന്നില്ല, അതിനെക്കുറിച്ച് ലോകത്തിന് ഉറപ്പ് നൽകാൻ തയ്യാറാണ്. തദ്ദേശീയമായി നിർമ്മിച്ച ഞങ്ങളുടെ ആണവ പദ്ധതിയിൽ ഞങ്ങൾ അഭിമാനിക്കുന്നു," ഖതിബ്സാദെ പറഞ്ഞു. ഇറാൻ ചർച്ചകൾക്ക് തയ്യാറാണെങ്കിലും, അവരുടെ ആണവ പദ്ധതിയും പ്രതിരോധവും ഉപേക്ഷിക്കാൻ ആരും അവരെ നിർബന്ധിക്കരുതെന്ന് ഇറാൻ പ്രസിഡന്റ് മസൂദ് പെസെഖിയാൻ നേരത്തെ പറഞ്ഞിരുന്നു.
Summary: Iran's Deputy Foreign Minister, Saeed Khatibzadeh, stated that Tehran is seeking a "peaceful nuclear agreement" with the United States to resolve the long-running dispute, but will not compromise its national security.