ടെഹ്റാൻ: അമേരിക്കയും ഇസ്രായേലും ഉൾപ്പെടെയുള്ള ശത്രുരാജ്യങ്ങളുമായി സഹകരിക്കുന്നവർക്കും ചാരവൃത്തിയിൽ ഏർപ്പെടുന്നവർക്കും വധശിക്ഷയും സ്വത്തുക്കൾ കണ്ടുകെട്ടലും ഉൾപ്പെടെയുള്ള കടുത്ത ശിക്ഷകൾ പ്രഖ്യാപിച്ച് ഇറാൻ (Iran Judiciary Spying Law). ഫെബ്രുവരി അവസാനം ആരംഭിച്ച യുദ്ധം ഒരു മാസം പിന്നിടുമ്പോഴാണ് നിയമം കൂടുതൽ കർശനമാക്കിയതായി ഇറാൻ ജുഡീഷ്യറി വക്താവ് അറിയിച്ചത്.
ശത്രുരാജ്യങ്ങൾക്ക് സഹായകമാകുന്ന തരത്തിൽ തന്ത്രപ്രധാനമായ സ്ഥലങ്ങളുടെ ചിത്രങ്ങളോ വീഡിയോകളോ പങ്കുവെക്കുന്നത് പോലും ഇന്റലിജൻസ് സഹകരണമായി കണക്കാക്കി നടപടിയെടുക്കും. കഴിഞ്ഞ ഒരു മാസത്തിനിടെ ഇത്തരം കുറ്റങ്ങൾക്കായി ആയിരത്തിലധികം പേരെ ഇറാൻ അറസ്റ്റ് ചെയ്തതായാണ് വിവരം. തെറ്റായ വിവരങ്ങൾ പ്രചരിപ്പിച്ച് ജനങ്ങളിൽ ഭീതി പടർത്തുന്നവർക്കും തടവുശിക്ഷ ലഭിക്കും. യുദ്ധകാലമായതിനാൽ ശിക്ഷാ നടപടികളിൽ ഇളവുണ്ടാകില്ലെന്നും വക്താവ് വ്യക്തമാക്കി.
2026 ഫെബ്രുവരി 28-നാണ് ഇസ്രായേലും അമേരിക്കയും ചേർന്ന് ഇറാനെതിരെ ആക്രമണം തുടങ്ങിയത്. ഇതിനെത്തുടർന്ന് മേഖലയിലാകെ പടർന്ന സംഘർഷത്തിൽ ആയിരക്കണക്കിന് ആളുകൾ കൊല്ലപ്പെടുകയും ആഗോള എണ്ണ വിതരണത്തെയും സമ്പദ്വ്യവസ്ഥയെയും ഇത് സാരമായി ബാധിക്കുകയും ചെയ്തിട്ടുണ്ട്. നിലവിൽ ഇറാൻ പരമോന്നത നേതാവ് അലി ഖൊമേനിയുടെ മരണത്തെത്തുടർന്ന് രാജ്യത്ത് വലിയ രാഷ്ട്രീയ മാറ്റങ്ങളും പ്രതിഷേധങ്ങളും നടക്കുകയാണ്.
Summary: Iran’s judiciary has announced that individuals accused of spying or cooperating with “hostile states” like the US and Israel could face the death penalty and total asset confiscation. Amid the ongoing war that began on February 28, 2026, sharing sensitive photos or videos is also treated as intelligence cooperation.
