ജക്കാർത്ത: ഇന്തോനേഷ്യയിലെ (Indonesia) സുമാത്ര ദ്വീപിലുണ്ടായ കനത്ത പ്രളയത്തിലും ഉരുൾപൊട്ടലിലും മരിച്ചവരോടുള്ള ആദരസൂചകമായി ഇത്തവണ രാജ്യത്ത് പുതുവത്സരാഘോഷങ്ങൾക്ക് കരിമരുന്ന് പ്രയോഗം ഒഴിവാക്കാൻ തീരുമാനം. തലസ്ഥാനമായ ജക്കാർത്തയും വിനോദസഞ്ചാര കേന്ദ്രമായ ബാലിയും ഉൾപ്പെടെയുള്ള പ്രവിശ്യകൾ വെടിക്കെട്ട് നിരോധിച്ചു. സർക്കാർ തീരുമാനത്തിന് പ്രസിഡന്റ് പ്രബോവോ സുബിയാന്തോയുടെ ഓഫീസ് പൂർണ്ണ പിന്തുണ പ്രഖ്യാപിച്ചു.
സുമാത്രയിൽ ആഞ്ഞടിച്ച പ്രളയത്തിൽ ഇതുവരെ 1,100-ലധികം ആളുകൾ മരിക്കുകയും ഏകദേശം നാല് ലക്ഷത്തോളം പേർ ഭവനരഹിതരാവുകയും ചെയ്തിട്ടുണ്ട്. ദുരന്തം നേരിട്ട ജനങ്ങളോട് ഐക്യദാർഢ്യം പ്രഖ്യാപിക്കേണ്ട സമയമാണിതെന്നും അതിനാൽ ആഘോഷങ്ങൾ പരിമിതപ്പെടുത്തണമെന്നും ഔദ്യോഗിക വക്താവ് പ്രസെത്യോ ഹാദി അറിയിച്ചു. ഉത്തര സുമാത്ര, പശ്ചിമ സുമാത്ര, ആഷെ തുടങ്ങിയ പ്രവിശ്യകളിലെ ഇരുപതോളം ഗ്രാമങ്ങൾ പ്രളയത്തിൽ പൂർണ്ണമായും ഒലിച്ചുപോയതായാണ് റിപ്പോർട്ട്.
ദുരന്തബാധിത മേഖലകളിൽ പുനരധിവാസ പ്രവർത്തനങ്ങൾക്കായി ഏകദേശം 3.11 ബില്യൺ ഡോളർ ചിലവ് വരുമെന്നാണ് കണക്കാക്കുന്നത്. പല പ്രദേശങ്ങളിലും ഇപ്പോഴും അടിയന്തരാവസ്ഥ തുടരുകയാണ്. ദുരന്തത്തിന്റെ പശ്ചാത്തലത്തിൽ പൊതുജനങ്ങൾ സ്വയം വെടിക്കെട്ടുകൾ ഒഴിവാക്കണമെന്ന് അധികൃതർ അഭ്യർത്ഥിച്ചിട്ടുണ്ട്.
Indonesia has banned New Year fireworks displays across several regions, including Jakarta and Bali, to mourn the victims of devastating floods in Sumatra. The disaster has claimed over 1,100 lives and displaced nearly 400,000 people, with several villages completely washed away. President Prabowo Subianto's office expressed solidarity with the victims, emphasizing empathy over celebration as the nation faces a multi-billion dollar recovery effort.