വാഷിങ്ടൺ: സ്വന്തം കുടുംബാംഗങ്ങളെ ഭീഷണിപ്പെടുത്തുകയും വീടിന് തീയിടാൻ ശ്രമിക്കുകയും ചെയ്ത സംഭവത്തിൽ ഇന്ത്യൻ വംശജനായ മനോജ് സായ് ലെല്ല (23) എന്ന വിദ്യാർത്ഥിയെ അമേരിക്കൻ പോലീസ് അറസ്റ്റ് ചെയ്തു. ടെക്സസ് സർവകലാശാലയിലെ അവസാന വർഷ വിദ്യാർത്ഥിയാണ് മനോജ്.(Indian-origin student arrested in US for threatening family members, trying to set house on fire)
മനോജ് തങ്ങളെ നിരന്തരം ഭീഷണിപ്പെടുത്തുന്നുവെന്ന് കുടുംബാംഗങ്ങൾ തന്നെയാണ് പോലീസിൽ പരാതി നൽകിയത്. പരാതി ലഭിച്ച ഉടൻ വീട്ടിലെത്തിയ പോലീസ് മനോജിനെ കസ്റ്റഡിയിലെടുത്തു. ഇയാളുടെ പക്കൽ നിന്ന് ഒരു ആയുധവും പോലീസ് പിടിച്ചെടുത്തിട്ടുണ്ട്. മാനസികമായ അസ്വസ്ഥതകളും കുടുംബാംഗങ്ങളുമായുള്ള തർക്കങ്ങളുമാണ് ഇത്തരമൊരു അക്രമത്തിന് പ്രേരിപ്പിച്ചതെന്നാണ് പ്രാഥമിക നിഗമനം.
രണ്ട് ഗുരുതരമായ കേസുകളാണ് മനോജിനെതിരെ പോലീസ് രജിസ്റ്റർ ചെയ്തിരിക്കുന്നത്. വാസസ്ഥലത്തിന് തീയിടാൻ ശ്രമിച്ചതിന് ഒരു ലക്ഷം ഡോളർ ബോണ്ട് തുക നിശ്ചയിച്ചു. കുടുംബാംഗങ്ങളെ ഭീഷണിപ്പെടുത്തിയതിന് 3,500 ഡോളർ കൂടി ബോണ്ട് തുകയായി നിശ്ചയിച്ചു.