ടെഹ്റാൻ: ഇറാൻ പരമോന്നത നേതാവ് ആയത്തുള്ള അലി ഖമേനിക്ക് പുറമെ ഇറാന്റെ സുരക്ഷാ-പ്രതിരോധ മേഖലയിലെ ഏറ്റവും നിർണ്ണായകമായ 15-ലധികം ഉന്നത ഉദ്യോഗസ്ഥരെ വധിച്ചതായി ഇസ്രായേൽ പ്രതിരോധ സേന അവകാശപ്പെട്ടു (IDF Claims 15 Top Iran Officials Killed). ഫെബ്രുവരി 28-ന് നടന്ന സംയുക്ത ആക്രമണത്തിൽ ഇറാന്റെ സൈനിക തലവൻമാരും ഐ.ആർ.ജി.സി (IRGC) കമാൻഡർമാരും കൊല്ലപ്പെട്ടതോടെ രാജ്യത്ത് വലിയൊരു നേതൃത്വ പ്രതിസന്ധി രൂപപ്പെട്ടിരിക്കുകയാണ്. ഇതിൽ ഖമേനിയുടെ അടുത്ത ഉപദേശകരും മിസൈൽ-ആണവ പദ്ധതികളുടെ ചുമതലയുള്ളവരും ഉൾപ്പെടുന്നു.
കൊല്ലപ്പെട്ടവരിൽ ഇറാന്റെ ചീഫ് ഓഫ് സ്റ്റാഫ് അബ്ദുറഹിം മൂസവി, ഐ.ആർ.ജി.സി കമാൻഡർ ഹുസൈൻ സലാമി, വ്യോമസേനാ തലവൻ അമീർ അലി ഹാജിസാദെ എന്നിവർ ഉൾപ്പെടുന്നതായി ഐ.ഡി.എഫ് പുറത്തുവിട്ട പട്ടിക വ്യക്തമാക്കുന്നു. ഇറാൻ പ്രതിരോധ മന്ത്രി അമീർ നാസിർസാദെയും ഹിസ്ബുള്ള നേതാവ് മുഹമ്മദ് റാദും കൊല്ലപ്പെട്ടവരിലുണ്ട്. ഇറാന്റെ അടുത്ത നേതൃത്വത്തിലേക്ക് പരിഗണിക്കപ്പെട്ടിരുന്ന മിക്കവരും ഈ ആക്രമണത്തിൽ കൊല്ലപ്പെട്ടതായി അമേരിക്കൻ പ്രസിഡന്റ് ഡൊണാൾഡ് ട്രംപ് പ്രതികരിച്ചു. ഖമേനിയുടെ മരണവാർത്ത പുറത്തുവന്നതോടെ ഇറാന്റെ ചില ഭാഗങ്ങളിൽ ജനങ്ങൾ തെരുവിലിറങ്ങി ആഘോഷിക്കുന്ന ദൃശ്യങ്ങളും പുറത്തുവരുന്നുണ്ട്.
കൊല്ലപ്പെട്ട പ്രധാന ഇറാനിയൻ നേതാക്കൾ:
- ആയത്തുള്ള അലി ഖമേനി: ഇറാന്റെ പരമോന്നത നേതാവ്.
- അബ്ദുറഹിം മൂസവി: ചീഫ് ഓഫ് സ്റ്റാഫ്, ഇറാൻ സൈന്യം.
- ഹുസൈൻ സലാമി: കമാൻഡർ-ഇൻ-ചീഫ്, ഐ.ആർ.ജി.സി.
- അമീർ അലി ഹാജിസാദെ: ഐ.ആർ.ജി.സി വ്യോമസേനാ തലവൻ.
- അമീർ നാസിർസാദെ: ഇറാൻ പ്രതിരോധ മന്ത്രി.
- അലി ഷംഖാനി: ഖമേനിയുടെ ഉന്നത ഉപദേശകൻ.
- മുഹമ്മദ് റാദ്: ഹിസ്ബുള്ള രാഷ്ട്രീയ വിഭാഗം തലവൻ.
