ധാക്ക: ബംഗ്ലദേശിൽ (Bangladesh) അതിരൂക്ഷമായ സംഘർഷങ്ങൾക്കിടയിൽ മൈമൻസിങ് ജില്ലയിൽ ഒരു ഹിന്ദു യുവാവിനെ ആൾക്കൂട്ടം തല്ലിക്കൊന്ന് മരത്തിൽ കെട്ടിത്തൂക്കി തീയിട്ടു. വ്യാഴാഴ്ച രാത്രിയാണ് ഭാലുക ഉപസിലയിലെ ദുബാലിയ പാറയിൽ ഈ ക്രൂരകൃത്യം നടന്നത്. ദീപു ചന്ദ്രദാസ് എന്ന യുവാവാണ് കൊല്ലപ്പെട്ടതെന്ന് ബിബിസി ബംഗ്ല റിപ്പോർട്ട് ചെയ്തു.
മതനിന്ദ ആരോപിച്ച് വ്യാഴാഴ്ച രാത്രി ഒൻപത് മണിയോടെ ഒരു സംഘം ആളുകൾ ദീപുവിനെ പിടികൂടി മർദിക്കുകയായിരുന്നു. തുടർന്ന് മരത്തിൽ കെട്ടിത്തൂക്കിയ ശേഷം ശരീരം തീകൊളുത്തി. പോലീസ് എത്തുമ്പോഴേക്കും ദീപു മരണപ്പെട്ടിരുന്നു.
സംഭവത്തെ ഇടക്കാല സർക്കാർ ശക്തമായി അപലപിച്ചു. "പുതിയ ബംഗ്ലദേശിൽ ഇത്തരം അക്രമങ്ങൾക്ക് സ്ഥാനമില്ലെന്നും കുറ്റവാളികളെ വെറുതെ വിടില്ലെന്നും" സർക്കാർ എക്സിലൂടെ (X) അറിയിച്ചു. ഏഴ് പേരെ ഇതിനോടകം അറസ്റ്റ് ചെയ്തിട്ടുണ്ട്. കഴിഞ്ഞ വർഷത്തെ വിദ്യാർത്ഥി പ്രക്ഷോഭത്തിലെ പ്രധാന നേതാവ് ശരീഫ് ഉസ്മാൻ ഹാദിയുടെ മരണത്തെത്തുടർന്നാണ് രാജ്യം വീണ്ടും കലാപത്തിലേക്ക് നീങ്ങിയത്. ഹാദിയുടെ മരണത്തിന് പിന്നാലെ ധാക്കയിൽ വ്യാപകമായ അക്രമങ്ങൾ അരങ്ങേറി.
ബംഗ്ലദേശിലെ പ്രമുഖ പത്രങ്ങളായ 'പ്രൊഥോം ആലോ', 'ഡെയ്ലി സ്റ്റാർ' എന്നിവയുടെ ഓഫീസുകൾക്ക് കലാപകാരികൾ തീയിട്ടു. ഡെയ്ലി സ്റ്റാർ പത്രത്തിന്റെ 27 വർഷത്തെ ചരിത്രത്തിനിടയിൽ ആദ്യമായി പത്രം അച്ചടിക്കുന്നത് നിർത്തേണ്ടി വന്നു. ബംഗ്ലദേശിലെ ന്യൂനപക്ഷങ്ങൾക്കും മാധ്യമങ്ങൾക്കും നേരെയുള്ള തുടർച്ചയായ ആക്രമണങ്ങളിൽ ഇന്ത്യ കടുത്ത ആശങ്ക രേഖപ്പെടുത്തി. പാർലമെന്ററി സ്റ്റാൻഡിംഗ് കമ്മിറ്റി വിഷയം ഗൗരവമായി ചർച്ച ചെയ്തു. ബംഗ്ലദേശിലെ ക്രമസമാധാന നില തകരുന്നതിലും ന്യൂനപക്ഷങ്ങളുടെ സുരക്ഷ ഉറപ്പാക്കുന്നതിലും രാജ്യാന്തര സമൂഹം ആശങ്ക പ്രകടിപ്പിച്ചിട്ടുണ്ട്.
Tensions escalated in Bangladesh following the brutal murder of a Hindu youth, Dipu Chandra Das, who was lynched and hung from a tree by a mob over blasphemy allegations in Mymensingh. In separate incidents, rioters set fire to the offices of leading media outlets, The Daily Star and Prothom Alo, causing extensive damage and looting equipment.