ബെയ്‌റൂട്ട്: തീവ്രവാദ സംഘടനയായ ഹിസ്ബുള്ളയുടെ ഉന്നത സൈനിക ഉദ്യോഗസ്ഥൻ ഹത്യാം അലി തബ്തായിയെ കൊലപ്പെടുത്തിയതായി ഇസ്രായേൽ സൈന്യം അറിയിച്ചു. ഞായറാഴ്ച ബെയ്‌റൂട്ടിൻ്റെ തെക്കൻ മേഖലയിൽ നടന്ന വ്യോമാക്രമണത്തിലാണ് ഇയാൾ കൊല്ലപ്പെട്ടതെന്നാണ് ഇസ്രായേൽ വിശദമാക്കുന്നത്. ഹത്യാം അലി തബ്തായിയുടെ മരണം ഹിസ്ബുള്ളയും സ്ഥിരീകരിച്ചു.(Hezbollah's top military commander killed in Israeli strike in Beirut)
ഒരു വർഷം മുമ്പ് യു.എസ്. മധ്യസ്ഥതയിൽ ലെബനോനും ഇസ്രായേലും വെടിനിർത്തൽ ധാരണയിലെത്തിയതിന് ശേഷവും ഇസ്രായേൽ ആക്രമണം തുടരുന്നതിനിടെയാണ് ഈ സംഭവം. ലെബനീസ് തലസ്ഥാനത്ത് മാസങ്ങൾക്കിടെ നടക്കുന്ന ആദ്യത്തെ ആക്രമണമാണിത്.
കൊല്ലപ്പെട്ട ഹത്യാം അലി തബ്തായിയെക്കുറിച്ചുള്ള വിവരങ്ങൾ നൽകുന്നവർക്ക് അമേരിക്ക നേരത്തെ വൻ തുക പാരിതോഷികം പ്രഖ്യാപിച്ചിരുന്നു. 2016-ൽ അമേരിക്ക ഇയാൾക്കെതിരെ ഉപരോധം ഏർപ്പെടുത്തി. സുപ്രധാന ഹിസ്ബുള്ള നേതാവായി സ്ഥിരീകരിച്ച അമേരിക്ക, ഇയാളെക്കുറിച്ചുള്ള വിവരങ്ങൾ നൽകുന്നവർക്ക് 5 മില്യൺ ഡോളർ (ഏകദേശം 45 കോടി രൂപ) വരെ പാരിതോഷികം വാഗ്ദാനം ചെയ്തിരുന്നു.
ഇറാൻ പിന്തുണയോടെ പ്രവർത്തിക്കുന്ന ഹിസ്ബുള്ളയുടെ രണ്ടാം തലമുറ നേതാക്കന്മാരിൽ പ്രമുഖനായിരുന്നു തബ്തായി. 1980-കളിലാണ് ഇയാൾ ഹിസ്ബുള്ളയിൽ ചേർന്നത്. റാഡ്‌വാൻ സേനയുടെ ഉയർന്ന പദവി ഉൾപ്പെടെ വഹിച്ചിരുന്ന തബ്തായി, സിറിയ, യെമൻ എന്നിവിടങ്ങളിലെ യുദ്ധങ്ങളിലും പങ്കെടുത്തിരുന്നു. പോരാട്ടമേഖലയിലെ പ്രാവീണ്യമാണ് ഇയാളെ ഹിസ്ബുള്ളയുടെ സുപ്രധാന പദവിയിലേക്ക് എത്തിച്ചത്.
'അവസാന ശ്വാസം വരെ ഇസ്രയേലിനെ എതിർത്ത നേതാവ്' എന്നും 'ഉന്നതനായ ജിഹാദിസ്റ്റ് നേതാവ്' എന്നുമാണ് ഹത്യാം അലി തബ്തായിയെ ഹിസ്ബുള്ള വിശേഷിപ്പിച്ചത്. ഇസ്രായേൽ സകല അതിർത്തികളും ലംഘിച്ചതായി ഹിസ്ബുള്ള വക്താവ് ആരോപിച്ചു.
ബഹുനില കെട്ടിടത്തിലാണ് ഇസ്രായേൽ വ്യോമാക്രമണം ഉണ്ടായത്. ലെബനോൻ ആരോഗ്യ മന്ത്രാലയം നൽകുന്ന വിവരമനുസരിച്ച്, ഈ ആക്രമണത്തിൽ അഞ്ച് പേർ കൊല്ലപ്പെടുകയും 28 പേർക്ക് പരിക്കേൽക്കുകയും ചെയ്തിട്ടുണ്ട്. കെട്ടിടത്തിന്റെ അവശിഷ്ടങ്ങൾ റോഡിലേക്കും പാർക്ക് ചെയ്ത കാറുകളിലേക്കും വീണാണ് നിരവധി പേർക്ക് പരിക്കേറ്റത്.
ഇസ്രായേലിൻ്റെ കടന്നുകയറ്റം അവസാനിപ്പിക്കാൻ അന്താരാഷ്ട്ര സമൂഹം ഇടപെടണമെന്ന് ലെബനീസ് പ്രസിഡൻ്റ് ജോസഫ് ഓൻ ആവശ്യപ്പെട്ടു. ലിയോ 14-ാമൻ മാർപ്പാപ്പ ലെബനോൻ സന്ദർശനത്തിന് എത്താൻ ഒരാഴ്ച മാത്രം ബാക്കി നിൽക്കെയാണ് ഈ സുപ്രധാന കൊലപാതകം. ഹിസ്ബുള്ള മേധാവി അടക്കം നിരവധി ഉന്നത നേതാക്കളെ ഇസ്രായേൽ ഇതിനോടകം കൊലപ്പെടുത്തിയിരുന്നു.