വാഷിങ്ടൺ: ഇറാനുമായുള്ള അമേരിക്കയുടെ സൈനിക നീക്കങ്ങളിൽ പ്രതിഷേധിച്ച് യുഎസ് നാഷണൽ കൗണ്ടർ ടെററിസം സെന്റർ ഡയറക്ടർ ജോ കെന്റ് സ്ഥാനം രാജിവെച്ചു. ഇറാനുമായുള്ള യുദ്ധം അമേരിക്കയുടെ ദേശീയ താൽപ്പര്യങ്ങൾക്കും സുരക്ഷയ്ക്കും വിരുദ്ധമാണെന്ന് ചൂണ്ടിക്കാട്ടിയാണ് അദ്ദേഹം പടിയിറങ്ങിയത്. ഇറാൻ യുദ്ധം ആരംഭിച്ച ശേഷം ട്രംപ് ഭരണകൂടത്തിൽ നിന്ന് രാജിവെക്കുന്ന ഏറ്റവും മുതിർന്ന ഉദ്യോഗസ്ഥനാണ് ജോ കെന്റ്.(Good thing he resigned, Trump on resignation of US counterterrorism center chief)
തന്റെ സോഷ്യൽ മീഡിയ അക്കൗണ്ടിലൂടെ പുറത്തുവിട്ട രാജിക്കത്തിൽ കടുത്ത ആരോപണങ്ങളാണ് അദ്ദേഹം ഉന്നയിച്ചിരിക്കുന്നത്. ഇസ്രായേലിന്റെയും അവരുടെ ശക്തമായ ലോബിയുടെയും സമ്മർദ്ദത്തിന് വഴങ്ങിയാണ് അമേരിക്ക ഈ അനാവശ്യ യുദ്ധത്തിലേക്ക് എടുത്തുചാടിയതെന്ന് അദ്ദേഹം ആരോപിച്ചു.
മുൻപ് ഇറാഖ് യുദ്ധത്തിലേക്ക് അമേരിക്കയെ നയിച്ചതുപോലെ തെറ്റായ വിവരങ്ങൾ പ്രചരിപ്പിച്ചാണ് ഇപ്പോഴത്തെ നീക്കവും. ആയിരക്കണക്കിന് സൈനികരുടെ ജീവൻ നഷ്ടപ്പെട്ട അത്തരം തെറ്റുകൾ ആവർത്തിക്കരുതെന്ന് അദ്ദേഹം മുന്നറിയിപ്പ് നൽകി. ഇറാൻ നിലവിൽ അമേരിക്കയ്ക്ക് നേരിട്ടുള്ള സുരക്ഷാ ഭീഷണിയൊന്നും ഉയർത്തുന്നില്ലെന്നും അദ്ദേഹം വ്യക്തമാക്കി.
ജോ കെന്റിന്റെ രാജിയെ സ്വാഗതം ചെയ്ത പ്രസിഡന്റ് ഡൊണാൾഡ് ട്രംപ്, അദ്ദേഹം സുരക്ഷാ കാര്യങ്ങളിൽ ‘വളരെ ദുർബലൻ’ ആണെന്ന് പരിഹസിച്ചു. ഇറാനെതിരായ ആക്രമണം യുഎസ് ദേശീയ സുരക്ഷയ്ക്ക് അത്യന്താപേക്ഷിതമാണെന്ന് മനസ്സിലാക്കാൻ കഴിയാത്ത ഉദ്യോഗസ്ഥരെ ഭരണകൂടത്തിന് ആവശ്യമില്ല. അദ്ദേഹത്തിന്റെ വീക്ഷണങ്ങൾ വെച്ച് നോക്കുമ്പോൾ ഈ രാജി ഉചിതമാണ്, ട്രംപ് വ്യക്തമാക്കി.
