ഷ്രോപ്ഷയർ: ബ്രിട്ടനിലെ ഷ്രോപ്ഷയറിൽ ബോട്ട് ഗതാഗതം സജീവമായ കനാലിൽ പെട്ടെന്നുണ്ടായ ഭീമൻ ഗർത്തം പരിഭ്രാന്തി പരത്തുന്നു. വൈറ്റ് ചർച്ചിലെ ലാൻഗോലൻ കനാലിലാണ് തിങ്കളാഴ്ച അപ്രതീക്ഷിതമായി വലിയ കിടങ്ങ് രൂപപ്പെട്ടത്. ഗർത്തത്തിലേക്ക് ബോട്ടുകൾ വീഴുകയും വെള്ളം പൂർണ്ണമായും ഒഴുകിപ്പോകുകയും ചെയ്തതോടെ മേഖലയിൽ അടിയന്തര സാഹചര്യം പ്രഖ്യാപിച്ചു.(Giant sinkhole in canal in Britain, Boats fall into pit)
കനാലിന്റെ എംബാങ്ക്മെന്റിലുണ്ടായ തകരാറാണ് അപകടത്തിന് കാരണമെന്ന് എൻജിനീയർമാർ വിലയിരുത്തുന്നു. ഏകദേശം 50 മീറ്റർ നീളത്തിലും നാല് അടി ആഴത്തിലുമാണ് ഗർത്തം രൂപപ്പെട്ടത്. ഇതോടെ കനാലിലെ വെള്ളം സമീപത്തെ കൃഷിഭൂമിയിലേക്കും മറ്റും അതിശക്തമായി ഇരച്ചുകയറി. രണ്ട് ചെറിയ ബോട്ടുകൾ ഗർത്തത്തിലേക്ക് മറിഞ്ഞെങ്കിലും ആളപായമൊന്നും റിപ്പോർട്ട് ചെയ്തിട്ടില്ല.
പ്രാദേശിക സമയം വൈകുന്നേരം 4.20-ഓടെയാണ് അപകടത്തെക്കുറിച്ചുള്ള വിവരങ്ങൾ ലഭിച്ചു തുടങ്ങിയതെന്ന് ഷ്രോപ്ഷയർ ഫയർ ആൻഡ് റെസ്ക്യൂ സർവീസ് അറിയിച്ചു. അമ്പതിലേറെ അഗ്നിരക്ഷാ പ്രവർത്തകരാണ് സ്ഥലത്തെത്തി രക്ഷാപ്രവർത്തനത്തിന് നേതൃത്വം നൽകുന്നത്. വെള്ളം കുറഞ്ഞതോടെ കനാലിൽ കുടുങ്ങിപ്പോയ മറ്റ് ബോട്ടുകളിൽ നിന്ന് ആളുകളെ സുരക്ഷിതമായി പുറത്തെത്തിച്ചു.
കനാലിലെ ജലനിരപ്പ് പൂർണ്ണമായും താഴ്ന്നതോടെ പരിസ്ഥിതി ആഘാതം കുറയ്ക്കാനുള്ള നടപടികൾ അധികൃതർ ആരംഭിച്ചിട്ടുണ്ട്. പ്രദേശം നിലവിൽ സുരക്ഷിതമല്ലെന്നും ഗർത്തം രൂപപ്പെട്ട സ്ഥലത്തേക്ക് ജനങ്ങൾ വരരുതെന്നും കർശന നിർദ്ദേശം നൽകിയിട്ടുണ്ട്.