വാഷിംഗ്ടൺ: അമേരിക്കയിലെ സർക്കാർ അടച്ചുപൂട്ടൽ റെക്കോർഡ് ദൈർഘ്യത്തിലേക്ക് കടക്കുന്ന സാഹചര്യത്തിൽ, താഴ്ന്ന വരുമാനക്കാരായ 42 ദശലക്ഷം അമേരിക്കക്കാർക്കുള്ള ഭക്ഷ്യസഹായം (SNAP) ഭാഗികമായേ നൽകാൻ സാധിക്കൂ എന്ന് വൈറ്റ് ഹൗസ് കോടതിയെ അറിയിച്ചു. പൊതു സേവനങ്ങളെ സ്തംഭിപ്പിച്ചുകൊണ്ടുള്ള ഷട്ട്ഡൗൺ രണ്ടാം മാസത്തിലേക്ക് കടക്കുന്നതിനിടെയാണ് ഭരണകൂടത്തിന്റെ ഈ സുപ്രധാന വെളിപ്പെടുത്തൽ.(Food assistance to 42 million Americans will be cut, says White House)
സപ്ലിമെന്റൽ ന്യൂട്രീഷൻ അസിസ്റ്റൻസ് പ്രോഗ്രാമിന്റെ (SNAP) നവംബറിലെ പേയ്‌മെന്റുകൾക്കായി കണക്കാക്കിയ 9 ബില്യൺ ഡോളർ ചെലവിലേക്ക്, ട്രംപ് ഭരണകൂടം 4.65 ബില്യൺ ഡോളർ അടിയന്തര ഫണ്ടായി ഉപയോഗിക്കണമെന്ന് കഴിഞ്ഞ ആഴ്ച രണ്ട് ഫെഡറൽ കോടതികൾ വിധിച്ചിരുന്നു. ഇതിന് പിന്നാലെയാണ് ഭാഗികമായേ തുക നൽകാനാകൂ എന്ന് വൈറ്റ് ഹൗസ് അറിയിച്ചത്.
ഒരു വീടിന് ശരാശരി 356 ഡോളർ (ഏകദേശം ₹29,500) എന്ന നിരക്കിലുണ്ടായിരുന്ന SNAP ഫണ്ടിംഗിന്റെ കാലാവധി ശനിയാഴ്ച അവസാനിച്ചിരുന്നു.
നിലവിലെ കണക്കുകൾ പ്രകാരം, എട്ട് അമേരിക്കക്കാരിൽ ഒരാൾ കുടുംബാവശ്യങ്ങൾക്കുള്ള പലചരക്ക് സാധനങ്ങൾ വാങ്ങുന്നതിന് കഷ്ടപ്പെടുന്നുണ്ട്. അമേരിക്കയിൽ സർക്കാർ ഷട്ട്ഡൗൺ രണ്ടാം മാസത്തിലേക്ക് കടന്നിരിക്കുകയാണ്. ലക്ഷക്കണക്കിന് സർക്കാർ ജീവനക്കാർ ശമ്പളമില്ലാതെ നിർബന്ധിത അവധിയിലാണ്. അവശ്യ സർവീസുകളിൽ പ്രവർത്തിക്കുന്നവർക്ക് പോലും ശമ്പളം മുടങ്ങുന്ന ഗുരുതരമായ സാഹചര്യമാണ് നിലവിലുള്ളത്.
ഷട്ട്ഡൗൺ അവസാനിപ്പിക്കാനുള്ള ശ്രമങ്ങളൊന്നും ഇതുവരെ ഫലം കണ്ടിട്ടില്ല. നിലവിലെ ഷട്ട്ഡൗൺ 30 ദിവസം പിന്നിട്ടിരിക്കുകയാണ്. 2019-ൽ ട്രംപിന്റെ ഭരണകാലത്തുണ്ടായ ഷട്ട്ഡൗൺ 35 ദിവസമാണ് നീണ്ടുനിന്നത്. ഈ റെക്കോർഡ് നിലവിലെ ഷട്ട്ഡൗൺ മറികടക്കുമോ എന്ന് വ്യക്തമല്ല.
സർക്കാർ അടച്ചുപൂട്ടൽ അവസാനിപ്പിക്കാനായി വൈറ്റ് ഹൗസ് റിപ്പബ്ലിക്കൻ, ഡെമോക്രാറ്റിക് നേതൃത്വവുമായി ചർച്ചകൾ നടത്തുന്നില്ല. ഡെമോക്രാറ്റിക് പാർട്ടിയുമായി ചർച്ചയ്ക്കില്ലെന്ന് ട്രംപ് പരസ്യമായി വ്യക്തമാക്കിക്കഴിഞ്ഞു.
ആരോഗ്യ പരിരക്ഷ, സബ്സിഡി ഉൾപ്പെടാത്ത ധന അനുമതി ബിൽ പാസാക്കാതെ ഡെമോക്രാറ്റുകളുമായി ഒരു ചർച്ചയ്ക്കും തയ്യാറല്ലെന്ന ഉറച്ച നിലപാടിലാണ് ട്രംപ്. എന്നാൽ, ആരോഗ്യ പരിരക്ഷ ഉൾപ്പെടുത്താതെ ധന അനുമതി ബിൽ പാസാക്കാൻ ആവില്ലെന്ന നിലപാടിൽ ഡെമോക്രാറ്റുകളും ഉറച്ചുനിൽക്കുന്നതോടെ പ്രതിസന്ധി തുടരുകയാണ്.