വാഷിംഗ്ടൺ: തന്റെ ഭരണത്തിന് കീഴിൽ അമേരിക്ക കൂടുതൽ സുരക്ഷിതവും സാമ്പത്തികമായി ഭദ്രവുമാണെന്ന് അവകാശപ്പെട്ട് പ്രസിഡന്റ് ഡൊണാൾഡ് ട്രംപ്. വൈറ്റ് ഹൗസിൽ രാജ്യത്തെ അഭിസംബോധന ചെയ്ത് സംസാരിക്കവെയാണ്, അനധികൃത കുടിയേറ്റം തടഞ്ഞത് മുതൽ യുദ്ധങ്ങൾ അവസാനിപ്പിച്ചത് വരെയുള്ള നേട്ടങ്ങൾ അദ്ദേഹം എണ്ണിപ്പറഞ്ഞത്.(Ended 8 wars, Donald Trump lists his administration's achievements)
അനധികൃത കുടിയേറ്റക്കാർക്കെതിരെ കർശന നടപടികൾ സ്വീകരിച്ചതോടെ രാജ്യം കൂടുതൽ സുരക്ഷിതമായെന്ന് ട്രംപ് അവകാശപ്പെട്ടു. മയക്കുമരുന്ന് കടത്ത് ഏകദേശം 90 ശതമാനത്തോളം ഇല്ലാതാക്കാൻ തന്റെ ഭരണകൂടത്തിന് സാധിച്ചു. വിദേശനയത്തിലെ വലിയ നേട്ടമായി അദ്ദേഹം ചൂണ്ടിക്കാട്ടിയത് വെറും 10 മാസത്തിനിടെ ലോകത്തിന്റെ വിവിധ ഭാഗങ്ങളിലായി എട്ട് യുദ്ധങ്ങൾ അവസാനിപ്പിച്ചു എന്നതാണ്.
ബൈഡൻ ഭരണകാലത്തേക്കാൾ വിലക്കയറ്റം കുറയ്ക്കാൻ കഴിഞ്ഞെന്നും ജനങ്ങളുടെ വേതനം വർധിച്ചുവെന്നും ട്രംപ് പറഞ്ഞു. സ്വകാര്യ മേഖലയിൽ വലിയ തോതിൽ തൊഴിലവസരങ്ങൾ സൃഷ്ടിക്കപ്പെട്ടു. നികുതിയിളവുകൾ വഴി പൗരന്മാരുടെ ജീവിതനിലവാരം മെച്ചപ്പെട്ടു. ഇതിലൂടെ ഓരോ വ്യക്തിക്കും പ്രതിവർഷം 11,000 ഡോളർ വരെ അധികമായി സമ്പാദിക്കാവുന്ന സാഹചര്യം ഒരുങ്ങിയെന്ന് അദ്ദേഹം വ്യക്തമാക്കി.
ഇൻഷുറൻസ് കമ്പനികളുടെ അമിത ലാഭം നിയന്ത്രിച്ചതായും കുറഞ്ഞ ചെലവിൽ മികച്ച ആരോഗ്യ ഇൻഷുറൻസ് ഉറപ്പാക്കിയതായും ട്രംപ് കൂട്ടിച്ചേർത്തു. അമേരിക്കൻ പൗരന്മാരുടെ താൽപ്പര്യങ്ങൾ സംരക്ഷിക്കുന്നതിനാണ് തന്റെ മുൻഗണനയെന്ന് വ്യക്തമാക്കിയാണ് ട്രംപ് പ്രസംഗം അവസാനിപ്പിച്ചത്.