'ട്രംപിൻ്റെ യുക്രെയ്ൻ സമാധാന പദ്ധതിക്ക് തിരുത്തലുകൾ വേണം, കീഴടങ്ങുന്ന സമാധാനം അംഗീകരിക്കില്ല': ഫ്രഞ്ച് പ്രസിഡൻ്റ് മാക്രോൺ | Emmanuel Macron

പാരീസ്: യുഎസ് പ്രസിഡൻ്റ് ഡൊണാൾഡ് ട്രംപ് മുന്നോട്ടുവെച്ച സമാധാന പദ്ധതി യുക്രെയ്‌നിനും യൂറോപ്പിനും സ്വീകാര്യമാവണമെങ്കിൽ അതിൽ തിരുത്തലുകൾ വരുത്തേണ്ടതുണ്ടെന്ന് ഫ്രഞ്ച് പ്രസിഡൻ്റ് ഇമ്മാനുവൽ മാക്രോൺ (Emmanuel Macron). RTL റേഡിയോക്ക് നൽകിയ അഭിമുഖത്തിലാണ് ഇമ്മാനുവൽ മാക്രോൺ തന്റെ നിലപ്പാട് വ്യക്തമാക്കിയത്. റഷ്യയ്ക്ക് അനുകൂലമായ ഒരു കരാറിനായി യുഎസ് ഭരണകൂടം യുക്രെയ്‌നിനെ നിർബന്ധിക്കുമോ എന്ന ആശങ്കകൾക്കിടെയാണ് മാക്രോണിൻ്റെ ഈ പ്രതികരണം.

ട്രംപിൻ്റെ 28 ഇന സമാധാന നിർദ്ദേശത്തെ മാക്രോൺ സ്വാഗതം ചെയ്തു. "ഇതൊരു നല്ല കാര്യമാണ്, കാരണം ഇത് സമാധാനത്തിലേക്ക് നയിക്കുന്നു," അദ്ദേഹം പറഞ്ഞു. എങ്കിലും "ചർച്ച ചെയ്യപ്പെടേണ്ടതും, വിലപേശലിലൂടെ പരിഷ്കരിക്കപ്പെടേണ്ടതും, മെച്ചപ്പെടുത്തേണ്ടതുമായ ചില കാര്യങ്ങൾ ഈ പദ്ധതിയിലുണ്ട്. ഞങ്ങൾക്ക് സമാധാനം വേണം, പക്ഷേ അത് ഫലത്തിൽ ഒരു കീഴടങ്ങലായി മാറുന്ന സമാധാനം ഞങ്ങൾക്ക് ആവശ്യമില്ല," മാക്രോൺ കൂട്ടിച്ചേർത്തു. എന്ത് പ്രദേശം വിട്ടുകൊടുക്കാൻ തയ്യാറാണെന്ന് തീരുമാനിക്കേണ്ടത് യുക്രെയ്ൻകാർ മാത്രമാണ്. റഷ്യക്കാർക്ക് സ്വീകാര്യമായ കാര്യങ്ങളാവാം പദ്ധതിയിൽ വെച്ചിരിക്കുന്നത്, എന്നാൽ അത് യുക്രെയ്‌നും യൂറോപ്പും അംഗീകരിക്കേണ്ട ഒന്നല്ല.

ശീതീകരിച്ച റഷ്യൻ ആസ്തികൾ യൂറോപ്പിലാണുള്ളതെന്നും അവയെക്കുറിച്ച് എന്ത് തീരുമാനമെടുക്കണമെന്ന് യൂറോപ്പിന് മാത്രമേ അവകാശമുള്ളൂ എന്നും മാക്രോൺ പറഞ്ഞു. യുക്രെയ്ൻ്റെ സൈന്യത്തിൻ്റെ വലുപ്പം പരിമിതപ്പെടുത്തണമെന്നും, മരവിപ്പിച്ച റഷ്യൻ ആസ്തികളിൽമേൽ യുഎസിന് നിയന്ത്രണം വേണമെന്നും ട്രംപിൻ്റെ പദ്ധതി ആവശ്യപ്പെടുന്ന സാഹചര്യത്തിലാണ് മാക്രോണിൻ്റെ ഈ പരാമർശങ്ങൾ.

യുദ്ധം അവസാനിച്ച ശേഷം "മുൻനിരയിൽ നിന്ന് വളരെ അകലെയായി" രൂപീകരിക്കുന്ന ഒരു ഉറപ്പുനൽകുന്ന സൈന്യത്തിൻ്റെ രൂപരേഖയും മാക്രോൺ വിശദീകരിച്ചു. നാറ്റോയുടെ കിഴക്കൻ ഭാഗങ്ങളിലെ ചില രാജ്യങ്ങളിൽ ചെയ്യുന്നതുപോലെ, സമാധാനം ഒപ്പുവെച്ച ശേഷം ബ്രിട്ടീഷ്, ഫ്രഞ്ച്, ടർക്കിഷ് സൈനികർ പരിശീലനവും സുരക്ഷാ പ്രവർത്തനങ്ങളും നടത്താൻ തയ്യാറാണെന്നും അദ്ദേഹം പറഞ്ഞു. വ്യോമം, കര, കടൽ മേഖലകളിൽ സജീവമായി സഹായിക്കാൻ 20-ഓളം രാജ്യങ്ങൾ സന്നദ്ധത അറിയിച്ചിട്ടുണ്ട്.