വാഷിങ്ടൺ: അന്താരാഷ്ട്ര ബഹിരാകാശ നിലയത്തിലുള്ള 'ക്രൂ 11' സംഘത്തിലെ ഒരംഗത്തിന് അപ്രതീക്ഷിതമായി ആരോഗ്യപ്രശ്നം നേരിട്ടതിനെത്തുടർന്ന് നാലംഗ സംഘത്തെയും ഉടൻ ഭൂമിയിലേക്ക് മടക്കിക്കൊണ്ടുവരുമെന്ന് നാസ അറിയിച്ചു. സഞ്ചാരിയുടെ സ്വകാര്യത കണക്കിലെടുത്ത് ആർക്കാണ് ആരോഗ്യപ്രശ്നമെന്നോ രോഗവിവരമെന്തെന്നോ നാസ വെളിപ്പെടുത്തിയിട്ടില്ല.(Emergency situation on the space station, NASA takes immediate measures on Crew 11 mission)
ജനുവരി 8-ന് സെന കാർഡ്മാനും മൈക്ക് ഫിൻകെയും ചേർന്ന് നടത്താനിരുന്ന ബഹിരാകാശ നടത്തം അവസാന നിമിഷം മാറ്റിവെച്ചിരുന്നു. ഇവരിലൊരാൾക്ക് ആരോഗ്യപ്രശ്നം കണ്ടെത്തിയതാണ് ഇതിന് കാരണമെന്ന് സൂചനയുണ്ട്.
സാധാരണയായി ആറ് മാസം നീളുന്ന ദൗത്യമാണ് ഇപ്പോൾ പാതിവഴിയിൽ അവസാനിപ്പിക്കുന്നത്. അടുത്ത മാസം വരെ ദൗത്യം നീട്ടാൻ സാധിക്കുമെങ്കിലും സഞ്ചാരിയുടെ ജീവന് മുൻഗണന നൽകി എത്രയും വേഗം മടക്കിക്കൊണ്ടുവരാനാണ് തീരുമാനം. അടുത്ത 48 മണിക്കൂറിനുള്ളിൽ സംഘത്തിന്റെ തിരിച്ചുവരവിനുള്ള കൃത്യമായ സമയവും തീയതിയും നാസ പ്രഖ്യാപിക്കും.