ബീജിംഗ്: അബദ്ധത്തിൽ സ്വന്തം ഫ്ലാറ്റിൽ കുടുങ്ങിപ്പോയ 89 വയസ്സുകാരി 27-ാം നിലയിൽ നിന്നും കെട്ടിടത്തിന് പുറത്തെ എയർ കണ്ടീഷണർ റെയിലിംഗിലൂടെ താഴേക്ക് ഇറങ്ങിയത് ആരെയും അമ്പരപ്പിക്കും (Elderly Woman Climb Down 27 Floors). ബീജിംഗിലെ ഒരു പാർപ്പിട സമുച്ചയത്തിലാണ് ഏപ്രിൽ ഒന്നിന് നാടിനെ നടുക്കിയ ഈ സംഭവം നടന്നത്. കെട്ടിടത്തിന് താഴെയുണ്ടായിരുന്ന സുരക്ഷാ ഉദ്യോഗസ്ഥരും ശുചീകരണ തൊഴിലാളികളുമാണ് 26-ാം നിലയിലെ റെയിലിംഗിൽ തൂങ്ങിക്കിടക്കുന്ന വൃദ്ധയെ ആദ്യം കണ്ടത്.
27-ാം നിലയിൽ താമസിക്കുന്ന വൃദ്ധ ബെഡ്റൂമിൽ കുടുങ്ങിപ്പോകുകയായിരുന്നു. ഫോൺ ലിവിംഗ് റൂമിലായതിനാൽ ആരെയും സഹായത്തിന് വിളിക്കാൻ അവർക്ക് സാധിച്ചില്ല. പരിഭ്രാന്തിയിലായ അവർ എയർ കണ്ടീഷണർ റെയിലിംഗിലൂടെ ഒന്നാം നിലയിലേക്ക് ഇറങ്ങാൻ തീരുമാനിക്കുകയായിരുന്നു. താഴെ നിന്നവർ നിലവിളിച്ചും മറ്റും അവരോട് അവിടെത്തന്നെ നിൽക്കാൻ ആവശ്യപ്പെട്ടെങ്കിലും അവർ താഴേക്ക് ഇറങ്ങുന്നത് തുടർന്നു.അഗ്നിരക്ഷാ സേന എത്തുമ്പോഴേക്കും അവർ 21-ാം നിലയിൽ എത്തിയിരുന്നു.
തളർന്നുപോയ അവരെ സുരക്ഷാ കയറുകൾ ഉപയോഗിച്ച് ബന്ധിപ്പിച്ച ശേഷം അഗ്നിരക്ഷാ സേനാംഗങ്ങൾ റെയിലിംഗിന്റെ ഒരു ഭാഗം മുറിച്ചുമാറ്റി സുരക്ഷിതമായ പ്ലാറ്റ്ഫോമിലേക്ക് മാറ്റി. അവർക്ക് വെള്ളവും വസ്ത്രവും നൽകി ആശ്വസിപ്പിച്ചു. ഏകദേശം 20 മിനിറ്റോളം വിശ്രമിച്ച ശേഷം 21-ാം നിലയിലെ ഒരു ഫ്ലാറ്റിന്റെ ജനാല വഴി സ്ട്രെച്ചർ ഉപയോഗിച്ച് ഒരു പാലം നിർമ്മിച്ചാണ് അവരെ കെട്ടിടത്തിനുള്ളിലേക്ക് എത്തിച്ചത്. ശാരീരികമായി പരിക്കുകളൊന്നുമില്ലെങ്കിലും അവർ അതീവ തളർച്ചയിലായിരുന്നു.
തക്കസമയത്ത് എത്തി തങ്ങളുടെ പ്രിയപ്പെട്ടവളെ രക്ഷിച്ച അഗ്നിരക്ഷാ സേനയ്ക്ക് കുടുംബാംഗങ്ങൾ നന്ദി അറിയിച്ചു. ഏകനായി താമസിക്കുന്ന പ്രായമായവർക്ക് ഇത്തരം സാഹചര്യങ്ങളിൽ സഹായം ലഭിക്കാൻ കൂടുതൽ സംവിധാനങ്ങൾ ആവശ്യമാണെന്ന് ഈ സംഭവം ഓർമ്മിപ്പിക്കുന്നു.
