ദുബായ്: ഇറാനിൽ പണപ്പെരുപ്പത്തിനും കറൻസി മൂല്യത്തകർച്ചയ്ക്കുമെതിരെ നടക്കുന്ന ജനകീയ പ്രക്ഷോഭത്തിൽ മരണസംഖ്യ ഉയരുന്നു (Economic Crisis Iran). വ്യാഴാഴ്ച വെസ്റ്റേൺ പ്രവിശ്യയായ ലൊറെസ്താനിൽ പോലീസ് സ്റ്റേഷന് നേരെ നടന്ന ആക്രമണത്തിൽ മൂന്ന് പ്രതിഷേധക്കാർ കൊല്ലപ്പെടുകയും 17 പേർക്ക് പരിക്കേൽക്കുകയും ചെയ്തതായി അർദ്ധ ഔദ്യോഗിക വാർത്താ ഏജൻസിയായ 'ഫാർസ്' റിപ്പോർട്ട് ചെയ്തു. പ്രതിഷേധക്കാർ പോലീസ് ആസ്ഥാനത്ത് അതിക്രമിച്ചു കയറി വാഹനങ്ങൾക്ക് തീയിട്ടതായും റിപ്പോർട്ടുകളുണ്ട്.
ലൊറെസ്താൻ കൂടാതെ ലോർഡെഗാൻ, ഇസ്ഫഹാൻ തുടങ്ങിയ നഗരങ്ങളിലും മരണങ്ങൾ റിപ്പോർട്ട് ചെയ്തിട്ടുണ്ട്. ലോർഡെഗാനിൽ സുരക്ഷാ സേനയും സായുധരായ പ്രതിഷേധക്കാരും തമ്മിലുണ്ടായ ഏറ്റുമുട്ടലിൽ രണ്ട് പേർ കൊല്ലപ്പെട്ടു. നേരത്തെ കുഹ്ദഷ്തിൽ ഒരു ബാസിജ് അർദ്ധസൈനികൻ കൊല്ലപ്പെട്ടതായി അധികൃതർ സ്ഥിരീകരിച്ചിരുന്നു. എന്നാൽ ഇയാൾ പ്രക്ഷോഭകാരിയായിരുന്നുവെന്നും സുരക്ഷാ സേനയുടെ വെടിയേറ്റാണ് മരിച്ചതെന്നുമാണ് മനുഷ്യാവകാശ സംഘടനയായ 'ഹെംഗാവോ' അവകാശപ്പെടുന്നത്.
കഴിഞ്ഞ ഞായറാഴ്ച വ്യാപാരികൾ ആരംഭിച്ച കടയടപ്പ് സമരം ഇപ്പോൾ രാജ്യവ്യാപകമായ പ്രക്ഷോഭമായി മാറിയിരിക്കുകയാണ്. പണപ്പെരുപ്പം 42.5 ശതമാനത്തിൽ എത്തിയതും കറൻസി മൂല്യം പകുതിയോളം ഇടിഞ്ഞതുമാണ് ജനങ്ങളെ തെരുവിലിറക്കിയത്. ജൂണിൽ ഇസ്രായേലുമായി ഉണ്ടായ 12 ദിവസത്തെ വ്യോമയുദ്ധം ഇറാന്റെ സമ്പദ്വ്യവസ്ഥയെ കൂടുതൽ തളർത്തി. പ്രതിഷേധം തണുപ്പിക്കാൻ ചർച്ചകൾക്ക് തയ്യാറാണെന്ന് സർക്കാർ അറിയിച്ചിട്ടുണ്ടെങ്കിലും, പ്രധാന നഗരങ്ങളിലെല്ലാം വൻതോതിൽ സൈന്യത്തെ വിന്യസിച്ചിരിക്കുകയാണ്.
Unrest in Iran has escalated into violence, with several deaths reported across various provinces as protests over economic hardships enter their fifth day. Clashes at a police station in Lorestan province left three protesters dead, while fatalities were also reported in Lordegan and Isfahan. The demonstrations, sparked by a 42.5% inflation rate and a sharp decline in the rial's value, represent the most significant challenge to Iran's clerical rulers in three years.