വാഷിഗ്ടൺ ഡിസി: അമേരിക്കയിൽ 2026-ഓടെ അനധികൃത കുടിയേറ്റക്കാർക്കെതിരെയുള്ള നടപടികൾ കൂടുതൽ ശക്തമാക്കാൻ ഡൊണാൾഡ് ട്രംപ് ഭരണകൂടം ഒരുങ്ങുകയാണ് (Immigration Crackdown). ഇതിനായി ഐസിഇ (ICE), ബോർഡർ പട്രോൾ എന്നീ ഏജൻസികൾക്ക് 170 ബില്യൺ ഡോളറിന്റെ (ഏകദേശം 14 ലക്ഷം കോടി രൂപ) ഫണ്ട് അനുവദിച്ചിട്ടുണ്ട്. ഈ തുക ഉപയോഗിച്ച് ആയിരക്കണക്കിന് പുതിയ ഏജന്റുമാരെ നിയമിക്കാനും കൂടുതൽ തടങ്കൽ പാളയങ്ങൾ തുറക്കാനും സർക്കാർ ലക്ഷ്യമിടുന്നു. മുൻകാലങ്ങളിൽ നിന്ന് വ്യത്യസ്തമായി, ഇത്തവണ ഫാക്ടറികളും കൃഷിയിടങ്ങളും ഉൾപ്പെടെയുള്ള ജോലിസ്ഥലങ്ങളിൽ നേരിട്ട് റെയ്ഡുകൾ നടത്തി നിയമരേഖകളില്ലാത്ത തൊഴിലാളികളെ പിടികൂടാനാണ് ഭരണകൂടത്തിന്റെ തീരുമാനം. പ്രതിവർഷം 10 ലക്ഷം പേരെ നാടുകടത്തുക എന്ന ലക്ഷ്യത്തോടെയാണ് ഈ നീക്കങ്ങൾ മുന്നോട്ട് പോകുന്നത്.
അതേസമയം, ട്രംപിന്റെ ഈ കടുത്ത നിലപാടുകൾക്കെതിരെ അമേരിക്കയിൽ വലിയ രീതിയിലുള്ള പ്രതിഷേധങ്ങളും രാഷ്ട്രീയ തിരിച്ചടികളും രൂപപ്പെടുന്നുണ്ട്. കുടിയേറ്റ വിഷയത്തിൽ ട്രംപിനുള്ള ജനപിന്തുണ മാർച്ചിലെ 50 ശതമാനത്തിൽ നിന്നും ഡിസംബറിൽ 41 ശതമാനമായി കുറഞ്ഞത് ഇതിന്റെ സൂചനയായി വിലയിരുത്തപ്പെടുന്നു. പല നഗരങ്ങളിലും ഫെഡറൽ ഏജന്റുമാരുടെ നടപടികൾക്കെതിരെ ജനങ്ങൾ തെരുവിലിറങ്ങുന്ന സാഹചര്യവുമുണ്ട്. വരാനിരിക്കുന്ന മിഡ്ടേം തിരഞ്ഞെടുപ്പുകളിൽ ഈ ജനവികാരം പ്രതിഫലിക്കുമെന്ന ആശങ്കയും രാഷ്ട്രീയ കേന്ദ്രങ്ങൾ പങ്കുവെക്കുന്നു. കൂടാതെ, ജോലിസ്ഥലങ്ങളിലെ റെയ്ഡുകൾ ഉല്പാദനച്ചെലവ് വർദ്ധിപ്പിക്കുമെന്നും ഇത് അമേരിക്കൻ സമ്പദ്വ്യവസ്ഥയെ ദോഷകരമായി ബാധിക്കുമെന്നും സാമ്പത്തിക വിദഗ്ധർ മുന്നറിയിപ്പ് നൽകുന്നുണ്ട്.
President Donald Trump is set to ramp up his immigration crackdown in 2026, backed by a massive $170 billion funding surge for ICE and Border Patrol. The plan includes increased workplace raids and the hiring of thousands of additional agents to meet a goal of 1 million deportations annually.