ടെഹ്റാൻ: ഇറാനിൽ സാമ്പത്തിക പ്രതിസന്ധിയെത്തുടർന്ന് ആരംഭിച്ച ജനകീയ പ്രക്ഷോഭം പത്ത് ദിവസമായിട്ടും ശമനമില്ലാതെ തുടരുകയാണ് (Economic Crisis Iran). പ്രതിഷേധക്കാർക്ക് നേരെയുണ്ടായ അക്രമങ്ങളിൽ ഇതുവരെ 35 പേർ കൊല്ലപ്പെട്ടതായാണ് മനുഷ്യാവകാശ സംഘടനകൾ റിപ്പോർട്ട് ചെയ്യുന്നത്. കൊല്ലപ്പെട്ടവരിൽ നാല് കുട്ടികളും രണ്ട് സുരക്ഷാ ഉദ്യോഗസ്ഥരും ഉൾപ്പെടുന്നു. രാജ്യത്തെ 31 പ്രവിശ്യകളിൽ 27-ലും പ്രക്ഷോഭം ആളിപ്പടർന്നു കഴിഞ്ഞു. ഏകദേശം 250-ലധികം കേന്ദ്രങ്ങളിൽ ജനങ്ങൾ തെരുവിലിറങ്ങി ഭരണകൂടത്തിനെതിരെ മുദ്രാവാക്യങ്ങൾ മുഴക്കുകയാണ്. ഇറാനിയൻ കറൻസിയായ റിയാലിന്റെ മൂല്യം റെക്കോർഡ് തകർച്ച നേരിട്ടതും പണപ്പെരുപ്പം അതിരൂക്ഷമായതുമാണ് ജനങ്ങളെ തെരുവിലേക്കിറക്കിയത്.
തുടക്കത്തിൽ ഭക്ഷണസാധനങ്ങളുടെ വിലക്കയറ്റത്തിനും സാമ്പത്തിക തകർച്ചയ്ക്കുമെതിരെയായിരുന്നു പ്രതിഷേധമെങ്കിലും ഇപ്പോൾ അത് ഭരണകൂട വിരുദ്ധ പ്രക്ഷോഭമായി മാറിയിട്ടുണ്ട്. സുരക്ഷാ സേന ഇതിനോടകം 1200-ലധികം പേരെ അറസ്റ്റ് ചെയ്ത് നീക്കി. ഇസ്രായേലുമായുള്ള 12 ദിവസത്തെ യുദ്ധത്തിന് പിന്നാലെ രാജ്യത്തുണ്ടായ സാമ്പത്തിക ആഘാതമാണ് കറൻസിയുടെ തകർച്ചയ്ക്ക് പ്രധാന കാരണമായത്. മാധ്യമപ്രവർത്തകർക്കും വാർത്താവിനിമയ സംവിധാനങ്ങൾക്കും കടുത്ത നിയന്ത്രണങ്ങൾ ഏർപ്പെടുത്തിയിട്ടുണ്ടെങ്കിലും സോഷ്യൽ മീഡിയയിലൂടെ പുറത്തുവരുന്ന ദൃശ്യങ്ങൾ ഇറാനിലെ ഗുരുതരമായ സാഹചര്യം വെളിപ്പെടുത്തുന്നു.
അതേസമയം, പ്രതിഷേധക്കാർക്കെതിരെ ഇറാൻ ഭരണകൂടം ബലപ്രയോഗം തുടർന്നാൽ നേരിട്ട് ഇടപെടുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകി. സമാധാനപരമായ പ്രക്ഷോഭങ്ങളെ അടിച്ചമർത്താൻ അനുവദിക്കില്ലെന്നും അമേരിക്കൻ സേന ഇതിനായി സജ്ജമാണെന്നും ട്രംപ് വ്യക്തമാക്കി. കഴിഞ്ഞ ദിവസം വെനസ്വേലൻ പ്രസിഡന്റിനെ അമേരിക്കൻ സൈന്യം പിടികൂടിയ സംഭവത്തിന് പിന്നാലെ ട്രംപ് നടത്തിയ ഈ ഭീഷണി മിഡിൽ ഈസ്റ്റിൽ കടുത്ത ആശങ്കയാണ് ഉയർത്തുന്നത്. എന്നാൽ, പ്രതിഷേധക്കാരെ നേരിടാൻ സുപ്രീം കൗൺസിൽ കടുത്ത തീരുമാനങ്ങളുമായി മുന്നോട്ട് പോകാനാണ് സാധ്യത.
The death toll in Iran's ongoing economic protests has surged to at least 35, with over 1,200 people detained across 27 provinces. Sparked by a record collapse of the rial and soaring inflation, the demonstrations have evolved into widespread anti-government protests. U.S. President Donald Trump has issued a stern warning to Tehran, stating that the U.S. is "locked and loaded" to intervene if peaceful protesters continue to be killed, heightening tensions following the recent U.S. capture of Venezuelan leader Maduro.