കൊളംബോ: ഡിറ്റ്‌വാ ചുഴലിക്കാറ്റ് (Ditwah Cyclone) ഭീകരനാശം വിതച്ചതിനെ തുടർന്ന് ശ്രീലങ്കയിൽ ഭരണകൂടം അടിയന്തരാവസ്ഥ പ്രഖ്യാപിച്ചു. നാശനഷ്ടം കനത്തതോടെ ഡിസംബർ 4 വരെ രാജ്യത്ത് ആരോഗ്യ അടിയന്തരാവസ്ഥയും പ്രഖ്യാപിച്ചിട്ടുണ്ട്. മരണസംഖ്യ നൂറ് കടന്നതായാണ് റിപ്പോർട്ടുകൾ.(Cyclone Ditwah, State of emergency declared in Sri Lanka)
കെലനി നദിയിൽ ജലനിരപ്പ് ഉയർന്നതോടെ തലസ്ഥാനമായ കൊളംബോ നഗരം പ്രളയഭീതിയിലാണ്. ശ്രീലങ്കയിൽ ഡിസംബർ 16 വരെ സ്കൂളുകൾ അടച്ചിടും. കൊളംബോ തുറമുഖം താൽക്കാലികമായി അടച്ചിരിക്കുകയാണ്. 700-ൽ അധികം വീടുകൾ പൂർണ്ണമായി തകർന്നതായാണ് പ്രാഥമിക കണക്കുകൾ.
രക്ഷാദൗത്യത്തിൽ ലങ്കൻ ക്രിക്കറ്റ് ടീം നായകൻ അസലങ്കയും മറ്റ് താരങ്ങളും പങ്കുചേർന്നു. രക്ഷാപ്രവർത്തനത്തിന് സഹായം നൽകിയ ഇന്ത്യക്ക് ലങ്കൻ സർക്കാരും പ്രതിപക്ഷ പാർട്ടികളും നന്ദി അറിയിച്ചു. ഡിറ്റ്‌വാ ചുഴലിക്കാറ്റിന്റെ സ്വാധീനഫലമായി തമിഴ്‌നാട്ടിലെ ഡെൽറ്റ ജില്ലകളിലും മഴ തുടങ്ങി. മുൻകരുതലിന്റെ ഭാഗമായി യാത്രാ സർവീസുകളിൽ തടസ്സമുണ്ടായി.
54 എ.ടി.ആർ. (ATR) സർവീസുകൾ റദ്ദാക്കി. ഇൻഡിഗോ എയർലൈൻസ് ചെന്നൈയിൽനിന്ന് മാത്രം 36 വിമാനങ്ങളാണ് റദ്ദാക്കിയത്. രാമേശ്വരത്ത് നിന്നുള്ള ഒരു ട്രെയിൻ പൂർണ്ണമായി റദ്ദാക്കി. മറ്റു 11 ട്രെയിനുകളും ഭാഗികമായി റദ്ദാക്കിയിട്ടുണ്ട്. തമിഴ്‌നാട്ടിലെ 14 ജില്ലകളിൽ എൻ.ഡി.ആർ.എഫ്., എസ്.ഡി.ആർ.എഫ്. സംഘങ്ങൾ എത്തിയിട്ടുണ്ട്. ചുഴലിക്കാറ്റ് നവംബർ 30-ന് വടക്കൻ തമിഴ്‌നാട്, പുതുച്ചേരി, തെക്കൻ ആന്ധ്രാപ്രദേശ് തീരത്തേക്ക് നീങ്ങാൻ സാധ്യതയുണ്ടെന്നാണ് ഏറ്റവും പുതിയ മുന്നറിയിപ്പ്.