കൊളംബോ: ശ്രീലങ്കയിൽ കനത്ത നാശം വിതച്ച് ആഞ്ഞടിച്ച ദിത്വാ ചുഴലിക്കാറ്റിലും തുടർന്നുള്ള ശക്തമായ മഴയിലും മണ്ണിടിച്ചിലിലും മിക്ക പ്രദേശങ്ങളും വെള്ളത്തിനടിയിലായി. ദുരന്തത്തിൽ ഇതുവരെ ഏകദേശം 190 പേർ മരിച്ചതായും നിരവധി ആളുകളെ കാണാതായതായും റിപ്പോർട്ടുകളുണ്ട്.
ഏകദേശം 190 പേർ മരിച്ചതായും, ഏറ്റവും കൂടുതൽ മരണങ്ങൾ റിപ്പോർട്ട് ചെയ്തത് കാൻഡി, ബദുള്ള ജില്ലകളിലാണെന്നുമാണ് റിപ്പോർട്ട്.
വിവിധ ജില്ലകളിലായി 20,000-ത്തിലധികം വീടുകൾ തകർന്നു. കനത്ത മഴയിൽ വീടുകളും കൃഷിയിടങ്ങളും റോഡുകളും വെള്ളത്തിനടിയിലാവുകയും പലയിടത്തും മണ്ണിടിച്ചിൽ സാഹചര്യമുണ്ടാവുകയും ചെയ്തു.
കെലാനി നദിയിലെ ജലനിരപ്പ് അതിവേഗം ഉയരുന്നതിനാൽ ചില പ്രദേശങ്ങളിൽ ആളുകളെ ഒഴിപ്പിക്കാൻ ഉത്തരവിട്ടിട്ടുണ്ട്. ദുരന്തബാധിത പ്രദേശങ്ങളിൽ സർക്കാരിൻ്റെയും സൈന്യത്തിൻ്റെയും നേതൃത്വത്തിൽ രക്ഷാപ്രവർത്തനങ്ങൾ പുരോഗമിക്കുകയാണ്. പ്രളയക്കെടുതിയിൽ വലയുന്ന ശ്രീലങ്കക്ക് സഹായവുമായി ഇന്ത്യ രംഗത്തെത്തി. കുടുങ്ങിക്കിടന്ന നിരവധി ആളുകളെ ഇന്ത്യൻ നാവികസേനയുടെ ഹെലികോപ്റ്ററുകൾ ഉപയോഗിച്ച് രക്ഷപ്പെടുത്തി.
കൊളംബോയിലെ ഇന്ത്യൻ ഹൈക്കമ്മീഷൻ ഇടപെട്ട് കുടുങ്ങിക്കിടക്കുന്ന ഇന്ത്യൻ യാത്രക്കാരെയും രക്ഷപ്പെടുത്തി വരികയാണ്.