ബുറുണ്ടി: കോംഗോയുടെ (Congo) കിഴക്കൻ മേഖലയിൽ വിമതർ തന്ത്രപ്രധാന നഗരങ്ങൾ പിടിച്ചടക്കിയതോടെ പതിനായിരക്കണക്കിന് ആളുകൾ അയൽരാജ്യമായ ബുറുണ്ടിയിലേക്ക് പലായനം ചെയ്യുന്നു. ഡിസംബർ ആദ്യം മുതൽ ഇതുവരെ 84,000-ത്തിലധികം ആളുകൾ അതിർത്തി കടന്നതായി ഐക്യരാഷ്ട്രസഭയുടെ അഭയാർത്ഥി ഏജൻസി (UNHCR) അറിയിച്ചു.
അതിർത്തി കടന്നെത്തുന്നവരിൽ ഭൂരിഭാഗവും സ്ത്രീകളും കുട്ടികളുമാണ്. ദിവസങ്ങളോളം ഭക്ഷണം ലഭിക്കാതെയും കിലോമീറ്ററുകളോളം നടന്നും എത്തുന്ന ഇവർ അതീവ ഗുരുതരമായ ശാരീരിക-മാനസിക ആരോഗ്യ പ്രശ്നങ്ങൾ നേരിടുന്നുണ്ടെന്ന് യുഎൻ വ്യക്തമാക്കി. പലരും മരച്ചുവടുകളിലും താൽക്കാലിക ഷെൽട്ടറുകളിലുമാണ് കഴിയുന്നത്. റുവാണ്ടയുടെ പിന്തുണയോടെ പ്രവർത്തിക്കുന്ന M23 വിമത വിഭാഗം ദക്ഷിണ കിവു പ്രവിശ്യയിലെ ഉവിര (Uvira) നഗരം പിടിച്ചെടുത്തതോടെയാണ് പലായനം ശക്തമായത്. എന്നാൽ അന്താരാഷ്ട്ര സമ്മർദ്ദത്തെത്തുടർന്ന് നഗരത്തിൽ നിന്ന് പിന്മാറുകയാണെന്ന് വിമതർ പ്രഖ്യാപിച്ചെങ്കിലും ഇപ്പോഴും അവിടെ ഇവരുടെ സാന്നിധ്യമുണ്ടെന്ന് പ്രാദേശിക മാധ്യമങ്ങൾ റിപ്പോർട്ട് ചെയ്യുന്നു.
അഭയാർത്ഥി പ്രവാഹം ബുറുണ്ടിയെ കടുത്ത സമ്മർദ്ദത്തിലാക്കിയിരിക്കുകയാണ്. ഗാറ്റുംബ (Gatumba), ബുഗാണ്ട (Buganda) തുടങ്ങിയ അതിർത്തി പ്രദേശങ്ങൾ അഭയാർത്ഥികളെക്കൊണ്ട് നിറഞ്ഞു. പലരും വിശപ്പടക്കാൻ പോലും മാർഗമില്ലാതെ നരകിക്കുകയാണെന്ന് പ്രാദേശിക ഭരണകൂടം അറിയിച്ചു. അമേരിക്കയുടെയും ഖത്തറിന്റെയും നേതൃത്വത്തിൽ സമാധാന ചർച്ചകൾ നടക്കുന്നുണ്ടെങ്കിലും വെടിനിർത്തൽ കരാറുകൾ ലംഘിക്കപ്പെടുന്നത് പ്രതിസന്ധി വർദ്ധിപ്പിക്കുന്നു. കിഴക്കൻ കോംഗോയിലെ വിവിധ സായുധ ഗ്രൂപ്പുകൾ തമ്മിലുള്ള പോരാട്ടം ഇതിനോടകം 70 ലക്ഷത്തിലധികം ആളുകളെ ഭവനരഹിതരാക്കിയിട്ടുണ്ടെന്നാണ് ഐക്യരാഷ്ട്രസഭയുടെ കണക്ക്.
Over 84,000 Congolese civilians have fled to Burundi following a violent offensive by M23 rebels in the eastern Democratic Republic of the Congo (DRC). The UN refugee agency (UNHCR) warns of a major humanitarian emergency as exhausted women and children arrive traumatized and hungry. While M23 announced a withdrawal from the strategic city of Uvira after international pressure, the conflict continues to destabilize the mineral-rich region, leaving thousands in makeshift camps without basic necessities.