ഖാർത്തൂം: സുഡാനിൽ ആഭ്യന്തരയുദ്ധം കടുക്കുന്നതിനിടെ, രാജ്യത്തിന്റെ പടിഞ്ഞാറൻ ഡാർഫർ മേഖലയിൽ സൈന്യത്തിൻ്റെ പ്രധാന ശക്തികേന്ദ്രങ്ങളിലൊന്നായ എൽ ഫാഷർ നഗരം റാപ്പിഡ് സപ്പോർട്ട് ഫോഴ്‌സ് (ആർ.എസ്.എഫ്.) പിടിച്ചെടുത്തു. ഈ നടപടിക്കിടെ നൂറുകണക്കിന് സാധാരണക്കാരെ ആർ.എസ്.എഫ്. കൊന്നൊടുക്കിയതായി റിപ്പോർട്ടുണ്ട്.
എൽ ഫാഷറിലെ പ്രധാന ആശുപത്രിയിൽ ഉണ്ടായിരുന്ന 460 സാധാരണക്കാരാണ് ആർ.എസ്.എഫിന്റെ നിഷ്ഠുരതയ്ക്ക് ഇരയായത്. നഗരത്തിലെ ആശുപത്രി സംവിധാനങ്ങൾ മനുഷ്യരെ കശാപ്പ് ചെയ്യുന്ന ഇടങ്ങളായി മാറിയെന്ന് സുഡാൻ ഡോക്ടേഴ്‌സ് നെറ്റ്‌വർക്ക് (എസ്.ഡി.എൻ.) പറഞ്ഞു. നാല് ഡോക്ടർമാർ ഉൾപ്പെടെ ആറ് ആരോഗ്യപ്രവർത്തകരെ ആർ.എസ്.എഫ്. തട്ടിക്കൊണ്ടുപോയതായും, ഇവരെ വിട്ടയക്കാൻ ഒന്നരലക്ഷം ഡോളർ (ഏകദേശം 1.25 കോടി രൂപ) മോചനദ്രവ്യം ആവശ്യപ്പെട്ടതായും വിവരമുണ്ട്. ഈ ക്രൂരതയെ ലോകാരോഗ്യസംഘടന (WHO) അപലപിക്കുകയും സംഭവത്തിൽ ഞെട്ടൽ രേഖപ്പെടുത്തുകയും ചെയ്തു.
വംശീയ ലക്ഷ്യങ്ങൾ?
2023 ഏപ്രിൽ മാസത്തിൽ സംഘർഷം പൊട്ടിപ്പുറപ്പെട്ടത് മുതൽ, അറബ് ഇതര ഗോത്രവിഭാഗങ്ങളെ ആർ.എസ്.എഫും അവരുടെ അറബ് കൂട്ടാളികളും ലക്ഷ്യംവെക്കുന്നതായുള്ള ആരോപണം ഉയർന്നിരുന്നു. ഈ ആരോപണങ്ങൾ ആർ.എസ്.എഫ്. നിഷേധിച്ചിരുന്നു.
എൽ ഫാഷർ ആർ.എസ്.എഫിൻ്റെ പിടിയിലായതോടെ അറബ് ഇതര വിഭാഗക്കാർ ഉൾപ്പെടെയുള്ള രണ്ടര ലക്ഷത്തിലധികം ആളുകൾ നഗരത്തിൽ കുടുങ്ങിയിട്ടുണ്ടെന്നാണ് ഐക്യരാഷ്ട്ര സംഘടനയും മറ്റ് സന്നദ്ധ സംഘടനകളും വിലയിരുത്തുന്നത്.
ആശയവിനിമയ സംവിധാനങ്ങൾ റദ്ദാക്കിയതിനാൽ, യാഥാർഥ്യം പൂർണ്ണമായി അറിയുന്നതിന് തടസ്സമുണ്ട്.
നിലവിലെ നിയന്ത്രണം
മുൻപ് സുഡാൻ സർക്കാരിന് കീഴിൽ പ്രവർത്തിച്ചിരുന്ന അർധ സൈനിക വിഭാഗമായിരുന്നു ആർ.എസ്.എഫ്. ആർ.എസ്.എഫ്. നിയന്ത്രണത്തിലുള്ള പ്രദേശങ്ങൾ: ഡാർഫർ, സമീപ പ്രദേശമായ കോർദോഫാൻ എന്നിവ ആർ.എസ്.എഫ്. ഇതിനകം പിടിച്ചെടുത്തു.സൈന്യത്തിൻ്റെ നിയന്ത്രണത്തിലുള്ള രാജ്യതലസ്ഥാനമായ ഖാർത്തൂം, മധ്യ-കിഴക്കൻ പ്രദേശങ്ങൾ എന്നിവ സുഡാൻ സൈന്യത്തിൻ്റെ നിയന്ത്രണത്തിലാണ്.