ബീജിങ്: വിചിത്രമായ പരമ്പരാഗത ചികിത്സാരീതി പിന്തുടർന്ന അമ്പതുകാരി വിഷബാധയെത്തുടർന്ന് തീവ്രപരിചരണ വിഭാഗത്തിൽ. കിഴക്കൻ ചൈനയിലാണ് സംഭവം. വിട്ടുമാറാത്ത തലവേദനയ്ക്കും മൈഗ്രെയ്നിനും പരിഹാരമെന്ന നിലയിൽ 2.5 കിലോഗ്രാം ഭാരമുള്ള 'ഗ്രാസ് കാർപ്പ്' (Grass Carp) വിഭാഗത്തിൽപ്പെട്ട മത്സ്യത്തിന്റെ പിത്താശയം പച്ചയ്ക്ക് വിഴുങ്ങിയതാണ് യുവതിയെ മരണവക്കിലെത്തിച്ചത്.
സംഭവം ഇങ്ങനെ...
മത്സ്യത്തിന്റെ പിത്താശയം കഴിക്കുന്നത് ശരീരത്തിലെ വിഷാംശം നീക്കം ചെയ്യാനും കാഴ്ചശക്തി വർദ്ധിപ്പിക്കാനും സഹായിക്കുമെന്ന അന്ധവിശ്വാസമാണ് യുവതി പിന്തുടർന്നത്. പിത്താശയം വിഴുങ്ങി രണ്ട് മണിക്കൂറിനുള്ളിൽ തന്നെ കടുത്ത ഛർദിയും വയറുവേദനയും വയറിളക്കവും അനുഭവപ്പെട്ടു. നില വഷളായതിനെ തുടർന്ന് ബന്ധുക്കൾ ആശുപത്രിയിൽ എത്തിക്കുകയായിരുന്നു.
പരിശോധനയിൽ യുവതിയുടെ കരളിന്റെയും വൃക്കയുടെയും പ്രവർത്തനങ്ങൾ ഗുരുതരമായി തടസ്സപ്പെട്ടതായി ഡോക്ടർമാർ കണ്ടെത്തി. തുടർന്ന് അഞ്ച് ദിവസം തീവ്രപരിചരണ വിഭാഗത്തിൽ ചികിത്സ നൽകിയ ശേഷമാണ് ആരോഗ്യനില മെച്ചപ്പെട്ടത്.
ഡോക്ടർമാരുടെ മുന്നറിയിപ്പ്...
മത്സ്യത്തിന്റെ പിത്താശയത്തിൽ അടങ്ങിയിരിക്കുന്ന വിഷവസ്തുക്കൾ അങ്ങേയറ്റം മാരകമാണെന്ന് ചികിത്സിച്ച ഡോക്ടർമാർ മുന്നറിയിപ്പ് നൽകുന്നു. ചില മത്സ്യങ്ങളുടെ പിത്താശയം ആർസെനിക്കിനേക്കാൾ വിഷാംശമുള്ളതാണ്. ഏതാനും ഗ്രാം പോലും ഒരു വ്യക്തിയെ അപകടത്തിലാക്കും. ഇതിലെ വിഷാംശം കരളിനെയും വൃക്കകളെയും നേരിട്ട് ബാധിക്കുകയും അവയവങ്ങളുടെ പ്രവർത്തനം നിലയ്ക്കുന്നതിലേക്ക് (Organ Failure) നയിക്കുകയും ചെയ്യും.
പിത്താശയം പാകം ചെയ്താലും ഇതിലെ വിഷാംശം നശിക്കില്ല എന്നതാണ് വസ്തുത. ഇത്തരം അശാസ്ത്രീയമായ ചികിത്സാ രീതികൾക്ക് പിന്നാലെ പോകാതെ കൃത്യമായ വൈദ്യസഹായം തേടണമെന്ന് ചൈനീസ് ആരോഗ്യവിദഗ്ധർ കർശന നിർദ്ദേശം നൽകി. കയ്പ്പുള്ള ഔഷധം ഫലപ്രദമാകുമെന്ന തെറ്റായ ധാരണയാണ് പലരെയും ഇത്തരം അപകടങ്ങളിലേക്ക് നയിക്കുന്നത്.