ടോക്കിയോ: പ്രമുഖ സാമ്പത്തിക ശക്തികളായ ജപ്പാനും ചൈനയും തമ്മിലുള്ള നയതന്ത്ര തർക്കം രൂക്ഷമായതിനെത്തുടർന്ന്, ജപ്പാനിൽ നിന്നുള്ള എല്ലാ സമുദ്രോത്പന്നങ്ങൾക്കും ചൈന സമ്പൂർണ നിരോധനം ഏർപ്പെടുത്തി. ജപ്പാൻ പ്രധാനമന്ത്രിയുടെ തായ്‌വാൻ പരാമർശങ്ങളാണ് ഈ പുതിയ നടപടിക്ക് വഴിവച്ചത്.
ചൈനയുടെ തായ്‌വാൻ ആക്രമണം ജപ്പാൻ്റെ നിലനിൽപ്പിന് ഭീഷണിയായാൽ സൈനികമായി പ്രതികരിക്കാൻ ജപ്പാന് അവകാശമുണ്ടെന്ന് ജപ്പാൻ പ്രധാനമന്ത്രി സാനെ തകൈച്ചി പ്രസ്താവിച്ചിരുന്നു. പ്രധാനമന്ത്രിയുടെ ഈ പരാമർശം പിൻവലിക്കണമെന്ന് ചൈന ആവശ്യപ്പെട്ടിരുന്നു. എന്നാൽ ജപ്പാൻ പരാമർശം പിൻവലിക്കാൻ തയ്യാറായില്ല. ഇതോടെയാണ് ഇരു രാജ്യങ്ങളും തമ്മിലുള്ള തർക്കങ്ങൾ രൂക്ഷമാകുന്നത്.
ഏതാനും മാസങ്ങൾക്ക് മുമ്പ്, ഫുകുഷിമ ആണവനിലയത്തിലെ ശുദ്ധീകരിച്ച മലിനജലം പുറത്തുവിട്ടതിനെത്തുടർന്ന് ഏർപ്പെടുത്തിയ സമുദ്രോത്പന്ന ഇറക്കുമതി നിയന്ത്രണങ്ങൾ ചൈന ഭാഗികമായി ലഘൂകരിച്ചിരുന്നു. എന്നാൽ നിലവിലെ നയതന്ത്ര തർക്കത്തിൻ്റെ പശ്ചാത്തലത്തിൽ, ജലനിർഗ്ഗമനം കൂടുതൽ നിരീക്ഷിക്കേണ്ടതുണ്ടെന്ന് ചൂണ്ടിക്കാട്ടി ചൈന വീണ്ടും സമ്പൂർണ നിരോധനം ഏർപ്പെടുത്തി. ജപ്പാൻ്റെ മൊത്തം സമുദ്രോത്പന്ന കയറ്റുമതിയുടെ അഞ്ചിലൊന്നിലധികം ചൈനീസ് വിപണിയാണ്. ഈ പുതിയ നിരോധനം ജാപ്പനീസ് കമ്പനികൾക്ക് കനത്ത തിരിച്ചടിയാകും.
ചൈനീസ് പൗരന്മാരോട് ജപ്പാനിലേക്കുള്ള യാത്ര ഒഴിവാക്കാൻ ചൈന ആവശ്യപ്പെട്ടതിനെത്തുടർന്ന് വൻതോതിൽ യാത്രകൾ റദ്ദാക്കപ്പെട്ടിരുന്നു. ഇത് ജപ്പാൻ്റെ സമ്പദ്‌വ്യവസ്ഥയ്ക്ക് കനത്ത ആഘാതമാണ്. ടൂറിസം മേഖലയ്ക്ക് പുറമെ, ഇരു രാജ്യങ്ങളും തമ്മിലുള്ള വാർഷിക പണ്ഡിത സംഗമങ്ങൾ, സൗഹൃദ പരിപാടികൾ, ജാപ്പനീസ് സിനിമകളുടെ പ്രദർശനങ്ങൾ എന്നിവയും റദ്ദാക്കിയിട്ടുണ്ട്.
China has banned all imports of Japanese seafood, escalating a diplomatic dispute fueled by Japanese Prime Minister Sanae Takaichi's recent remarks suggesting that a Chinese attack on Taiwan could trigger a military response from Tokyo.