വാഷിങ്ടൺ: തായ്വാൻ വിഷയത്തിൽ ചൈനയുമായി സൈനിക സംഘർഷമുണ്ടായാൽ അമേരിക്കൻ യുദ്ധവിമാനങ്ങളെ തകർക്കാനും യുഎസ് സൈന്യത്തെ പരാജയപ്പെടുത്താനും ചൈനയ്ക്ക് സാധിക്കുമെന്ന മുന്നറിയിപ്പുമായി യുഎസ് രഹസ്യരേഖ. ന്യൂയോർക്ക് ടൈംസ് ആണ് ഇക്കാര്യം റിപ്പോർട്ട് ചെയ്തത്.(China could defeat US in case of conflict, says US secret document)
അമേരിക്ക ഇപ്പോഴും ചെലവേറിയതും താരതമ്യേന ദുർബലവുമായ ആയുധങ്ങളെ ആശ്രയിക്കുമ്പോൾ, എതിരാളികൾ വില കുറഞ്ഞതും എന്നാൽ സാങ്കേതികമായി കൂടുതൽ മികച്ചതുമായ ആയുധങ്ങൾ വികസിപ്പിക്കുകയാണെന്ന് രഹസ്യരേഖയിൽ പറയുന്നു. യുഎസ് യുദ്ധവിമാനങ്ങൾ, യുദ്ധക്കപ്പലുകൾ, ഉപഗ്രഹങ്ങൾ എന്നിവ തകർക്കാനുള്ള ചൈനയുടെ കഴിവുകളെക്കുറിച്ച് റിപ്പോർട്ടിൽ വിശദീകരിക്കുന്നുണ്ട്.
യുഎസ് സൈന്യത്തിൻ്റെ വിതരണ ശൃംഖലയിലെ ദൗർബല്യങ്ങളും രേഖ എടുത്തു കാണിക്കുന്നു. 2021-ൽ ജോ ബൈഡൻ ഭരണകാലത്ത് ഒരു ദേശീയ സുരക്ഷാ ഉദ്യോഗസ്ഥന് ഈ രഹസ്യരേഖ ലഭിച്ചപ്പോൾ അദ്ദേഹം പകച്ചുപോയെന്ന് റിപ്പോർട്ട് ചെയ്തു. തായ്വാൻ വിഷയത്തിൽ ഇടപെടാനുള്ള എല്ലാ വിദേശ ശ്രമങ്ങളെയും തകർക്കുമെന്ന് ചൈന മുന്നറിയിപ്പ് നൽകിയതിന് പിന്നാലെയാണ് ഈ റിപ്പോർട്ട് പുറത്തുവരുന്നത്.
"എല്ലാ വിദേശ ഇടപെടലുകളെയും ഞങ്ങൾ തകർക്കും," തായ്വാൻ വിഷയങ്ങൾ കൈകാര്യം ചെയ്യുന്ന ചൈനീസ് മന്ത്രാലയത്തിൻ്റെ വക്താവ് പെങ് ക്വിംഗെൻ വാർത്താ സമ്മേളനത്തിൽ പറഞ്ഞു. തായ്വാന് അടുത്തുള്ള ദ്വീപിൽ ജപ്പാൻ മിസൈലുകൾ സ്ഥാപിച്ചതിനെതിരെയും ചൈന ശക്തമായ മുന്നറിയിപ്പ് നൽകിയിരുന്നു.
യുഎസിൻ്റെ ഓരോ തന്ത്രത്തിനും ചൈനയുടെ പക്കൽ ബദലുകളുണ്ടെന്ന് രേഖ വ്യക്തമാക്കുന്നു. ഒരു മഹാശക്തിയുമായി യുദ്ധം ചെയ്ത് വിജയിക്കാനുള്ള യുഎസിൻ്റെ ശക്തിയിൽ കുറവുണ്ടായതായും രഹസ്യരേഖയിൽ പറയുന്നു. തായ്വാൻ തങ്ങളുടെ ഭാഗമാണെന്ന് ചൈന അവകാശപ്പെടുന്നു. എന്നാൽ, തായ്വാൻ ഇത് അംഗീകരിക്കുന്നില്ല. തായ്വാന് സൈനിക സഹായം നൽകുന്നത് യുഎസ് ആണ്. ഈ സാഹചര്യത്തിൽ ഇരു രാജ്യങ്ങളും തമ്മിൽ സംഘർഷ സാധ്യതകൾ വർധിക്കുന്നതിനിടെയാണ് യുഎസ് സൈന്യത്തിൻ്റെ ദൗർബല്യങ്ങൾ വെളിപ്പെടുത്തുന്ന രഹസ്യരേഖ പുറത്തായത്.