ദോഹ: ഖത്തറിലെത്തിയ കേരള മുഖ്യമന്ത്രി പിണറായി വിജയൻ ഖത്തർ ചേംബർ ഓഫ് കൊമേഴ്സ് ആസ്ഥാനം സന്ദർശിച്ച് ചർച്ചകൾ നടത്തി. ഖത്തറും കേരളവും തമ്മിലുള്ള നിക്ഷേപ സാധ്യതകളെക്കുറിച്ചാണ് പ്രധാനമായും ചർച്ച നടന്നത്. ഖത്തർ ചേംബർ ഫസ്റ്റ് വൈസ് ചെയർമാൻ മുഹമ്മദ് ബിൻ അഹമ്മദ് ബിൻ ത്വാർ അൽ കുവാരി മുഖ്യമന്ത്രിയെ സ്വീകരിച്ചു.(Chief Minister Pinarayi Vijayan visited the headquarters of the Qatar Chamber of Commerce)
ഖത്തർ ചേംബർ ഡയറക്ടർ ബോർഡ് അംഗങ്ങളായ അബ്ദുൾ റഹ്മാൻ അൽ അൻസാരി, ഷഹീൻ മുഹമ്മദ് അൽ മുഹന്നദി എന്നിവരും ചർച്ചയിൽ പങ്കെടുത്തു. കേരളത്തെ പ്രതിനിധീകരിച്ച്, ഖത്തറിലെ ഇന്ത്യൻ അംബാസഡർ വിപുൽ, കേരള സാംസ്കാരിക മന്ത്രി സജി ചെറിയാൻ, ചീഫ് സെക്രട്ടറി ഡോ. എ. ജയതിലക്, നോർക്ക വൈസ് ചെയർമാൻ എം.എ. യൂസഫലി, ലുലു ഗ്രൂപ്പ് ഡയറക്ടർ മുഹമ്മദ് അൽത്താഫ്, സി.വി. റപ്പായി എന്നിവരും പങ്കെടുത്തു.
ഇന്നലെ രാവിലെയാണ് മുഖ്യമന്ത്രി ദോഹയിലെത്തിയത്. ലോക കേരള സഭയുടെയും മലയാളം മിഷൻ സംസ്‌കൃതി ഖത്തർ ചാപ്റ്ററിന്റെയും സംയുക്താഭിമുഖ്യത്തിൽ സംഘടിപ്പിച്ച 'മലയാളോത്സവം 2025' പരിപാടിയിൽ മുഖ്യമന്ത്രി പങ്കെടുത്തു.
കൂടാതെ, ഖത്തർ അന്താരാഷ്ട്ര സഹകരണ സഹമന്ത്രിക്ക് മുഖ്യമന്ത്രി 'ഷീൽഡ് ഓഫ് ഹ്യുമാനിറ്റി' (മാനവികതാ പുരസ്കാരം) നൽകി. മാനുഷിക മേഖലയിലെ പ്രവർത്തനങ്ങൾക്കുള്ള ആദരമായാണ് ഈ ബഹുമതി. ഖത്തറിലെ കേരളീയ സമൂഹത്തിന് നൽകുന്ന പിന്തുണയ്ക്കും മാനുഷിക പ്രവർത്തനങ്ങൾക്കും മുഖ്യമന്ത്രി നന്ദി അറിയിച്ചു.