അബുജ : നൈജീരിയയിലെ ബോർണോ സ്റ്റേറ്റിലെ മുസ്സ ജില്ലയിൽ ബോക്കോ ഹറാം തീവ്രവാദികൾ നടത്തിയ ആക്രമണത്തിൽ 12 കൗമാരപ്രായക്കാരായ പെൺകുട്ടികളെ തട്ടിക്കൊണ്ടുപോയി. കൃഷിയിടങ്ങളിൽനിന്ന് വൈകുന്നേരം അഞ്ചു മണിയോടെ മടങ്ങുകയായിരുന്ന പെൺകുട്ടികളെയാണ് 'അസ്‌കിറ ഉബയി'ൽ വെച്ച് തീവ്രവാദികൾ തട്ടിക്കൊണ്ടുപോയതെന്ന് ബോർണോ സ്റ്റേറ്റ് പോലീസ് പബ്ലിക് റിലേഷൻസ് ഓഫീസർ എ.എസ്.പി. നഹും ദാസോ സ്ഥിരീകരിച്ചു.(Boko Haram attack in Nigeria, 12 teenage girls kidnapped)
തട്ടിക്കൊണ്ടുപോകലിന് പുറമെ, തീവ്രവാദികൾ മഗുമേരി ഗ്രാമത്തിൽ രണ്ട് മണിക്കൂറിലധികം നീണ്ട ആക്രമണം നടത്തി. പുലർച്ചെ ഒന്നരയോടെ മോട്ടോർ സൈക്കിളുകളിലെത്തിയ തീവ്രവാദികൾ ആളുകളെ ഭയപ്പെടുത്തി ഓടിക്കുകയും വെടിയുതിർക്കുകയും ചെയ്തു. വീടുകളും വാഹനങ്ങളും കടകളും ഉൾപ്പെടെ ഗ്രാമത്തിലെ നിരവധി കെട്ടിടങ്ങൾക്ക് തീയിട്ടു.
പുലർച്ചെ മൂന്നു മണിയോടെയാണ് അക്രമികൾ രക്ഷപ്പെട്ടത്. ആളപായമൊന്നും സംഭവിച്ചില്ലെന്ന് പോലീസ് അറിയിച്ചു. ആക്രമണത്തിനു ശേഷം സുരക്ഷാ ഉദ്യോഗസ്ഥർ പ്രദേശത്ത് ക്യാമ്പ് ചെയ്യുന്നുണ്ട്. നൈജീരിയയിൽ സായുധ സംഘങ്ങൾ ക്രൈസ്തവർക്കെതിരെ നടത്തുന്ന ആക്രമണങ്ങൾ വർധിച്ചുവരികയാണ്. ഏതാനും ദിവസങ്ങൾക്ക് മുൻപ് തലസ്ഥാനമായ അബുജയുമായി അതിർത്തി പങ്കിടുന്ന പ്രദേശത്ത് ഒരു സ്വകാര്യ കത്തോലിക്കാ സ്കൂളിൽ അതിക്രമിച്ചു കയറിയ സായുധധാരികൾ നൂറുകണക്കിന് വിദ്യാർഥികളെ തട്ടിക്കൊണ്ടുപോയിരുന്നു.
ക്രിസ്ത്യൻ അസോസിയേഷൻ ഓഫ് നൈജീരിയ (CAN) നൽകിയ റിപ്പോർട്ട് പ്രകാരം ആക്രമണത്തിനിടെ ചില വിദ്യാർഥികൾ രക്ഷപ്പെട്ടെങ്കിലും, 215 വിദ്യാർഥികളെയും 12 അധ്യാപകരെയും തീവ്രവാദികൾ തട്ടിക്കൊണ്ടുപോയി. മതപരമായ ലക്ഷ്യങ്ങളോടുകൂടിയ ആക്രമണങ്ങൾ, വംശീയ/സാമുദായിക സംഘർഷങ്ങൾ എന്നിവയാൽ രാജ്യം കടുത്ത പ്രതിസന്ധിയിലാണെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. ഈ ആഴ്ച മാത്രം നിരവധിപേരാണ് രാജ്യത്ത് ഇത്തരത്തിൽ അക്രമികളുടെ ഇരകളായത്.