വലിപ്പത്തിൽ ചെറുതാണെങ്കിലും, കടൽത്തീരത്ത് ഒളിഞ്ഞിരിക്കുന്ന വീവർ ഫിഷ് (Weever Fish) മനുഷ്യർക്ക് ഗുരുതരമായ വേദനയും അസ്വസ്ഥതകളും നൽകാൻ കഴിവുള്ളവയാണ്. ഇവയുടെ കുത്തേറ്റാൽ ചിലർക്ക് ബോധക്ഷയം വരെ സംഭവിച്ചേക്കാം. ഇളം തവിട്ടുനിറത്തിലും വളരെ നേർത്ത ആകൃതിയിലുമാണ് ഇവ കാണപ്പെടുന്നത്. ഏകദേശം 8 മുതൽ 12 സെന്റീമീറ്റർ വരെയാണ് സാധാരണ വലിപ്പമെങ്കിലും 37 സെന്റീമീറ്റർ വരെയും ഇവയ്ക്ക് വളരാൻ സാധിക്കും.
വിഷമുള്ള മുള്ളുകൾ
വീവർ ഫിഷുകൾ കടൽത്തീരത്തെ മണ്ണിൽ പറ്റിപ്പിടിച്ചാണ് കഴിയുന്നത്. പലപ്പോഴും മണ്ണിനടിയിൽ ഒളിച്ചിരിക്കുന്ന ഇവയെ കണ്ടെത്താൻ പ്രയാസമാണ്. ഈ സമയം, ഇവയുടെ മുകൾഭാഗത്തെ ചിറക് മാത്രമേ മണ്ണിന് പുറത്ത് കാണാനാകൂ.
ഈ ചിറകുകളിലാണ് മറ്റ് ജീവികൾക്ക് വില്ലനാകുന്ന മൂന്ന് വിഷമുള്ള മുള്ളുകൾ ഒളിച്ചിരിക്കുന്നത്.
ഈ വിഷം മനുഷ്യരിൽ ഗുരുതരമായ ആരോഗ്യപ്രശ്നങ്ങൾ സൃഷ്ടിക്കില്ലെങ്കിലും, മുള്ളുകൊണ്ട് കഴിഞ്ഞാൽ അതിശക്തമായ വേദനയാണ് അനുഭവപ്പെടുക. വേദനയുടെ തീവ്രതയും ശാരീരിക അസ്വസ്ഥതകളും ഓരോ വ്യക്തിയിലും വ്യത്യാസപ്പെടാം.കുത്തേറ്റ ഭാഗം തടിച്ച് വീർക്കാൻ സാധ്യതയുണ്ട്. യൂറോപ്യൻ തീരങ്ങളിലാണ് ഇവയെ കൂടുതലായി കണ്ടുവരുന്നത്. വീവർ ഫിഷുകളുടെ സാന്നിധ്യം കണക്കിലെടുത്ത് യു.കെ., അയർലൻഡ് തുടങ്ങിയ രാജ്യങ്ങളിലെ ബീച്ചുകളിൽ സഞ്ചാരികൾക്ക് മുന്നറിയിപ്പ് നൽകുന്നത് പതിവാണ്.