ധാക്ക: ബംഗ്ലാദേശ് മുൻ പ്രധാനമന്ത്രി ഷെയ്ഖ് ഹസീന ഉൾപ്പെടെ 260 പേരെയും ബംഗ്ലാദേശ് സിഐഡി പിടികിട്ടാപ്പുള്ളികളായി പ്രഖ്യാപിച്ചു. "ജോയ് ബംഗ്ലാ ബ്രിഗേഡ്" എന്ന സംഘടനയുമായി ബന്ധപ്പെട്ട രാജ്യദ്രോഹ കേസിലാണ് നടപടി. ധാക്ക മെട്രോപൊളിറ്റൻ മജിസ്‌ട്രേറ്റ് കോടതിയുടെ ഉത്തരവ് അനുസരിച്ചാണ് സിഐഡി വെള്ളിയാഴ്ച നോട്ടീസ് പുറത്തിറക്കിയതായി ധാക്ക ട്രിബ്യൂൺ റിപ്പോർട്ട് ചെയ്തു. സിഐഡി സ്പെഷ്യൽ സൂപ്രണ്ട് ജാസിം ഉദ്ദീൻ ഖാൻ ഒപ്പുവെച്ച ഈ നോട്ടീസ്, ബംഗ്ലാദേശിലെ 'ദി ഡെയ്‌ലി സ്റ്റാർ', 'അമർ ദേശ്' എന്നീ പ്രമുഖ പത്രങ്ങളിൽ പ്രസിദ്ധീകരിച്ചിട്ടുണ്ട്. (Sheikh Hasina)
ബംഗ്ലാദേശ് ആഭ്യന്തര മന്ത്രാലയത്തിന്റെ അനുമതിയോടെ, ക്രിമിനൽ നടപടിക്രമ നിയമത്തിലെ (സിആർപിസി) സെക്ഷൻ 196 പ്രകാരമുള്ള രാജ്യദ്രോഹക്കുറ്റക്കേസിൽ സിഐഡി അന്വേഷണം ആരംഭിച്ചത്. "ജോയ് ബംഗ്ലാ ബ്രിഗേഡ്" എന്ന ഓൺലൈൻ പ്ലാറ്റ്‌ഫോം വഴി രാജ്യത്തിനകത്തും പുറത്തും ഗൂഢാലോചന നടന്നതായും നിയമാനുസൃത സർക്കാരിനെ അട്ടിമറിക്കാൻ ലക്ഷ്യമിട്ടതായും അന്വേഷണത്തിൽ തെളിവുകൾ കണ്ടെത്തിയതായി ധാക്ക ട്രിബ്യൂൺ റിപ്പോർട്ട് ചെയ്യുന്നു.
അതേസമയം, ഷെയ്ഖ് ഹസീനയുടെയും അവരുടെ പിതാവ് ഷെയ്ഖ് മുജിബുർ റഹ്മാന്റെയും കടുത്ത അനുയായികളാണ് തങ്ങളെന്നാണ് "ജോയ് ബംഗ്ലാ ബ്രിഗേഡ്" അവരുടെ വെബ്സൈറ്റിൽ അവകാശപ്പെടുന്നത്. ബംഗ്ലാദേശിലെ ഇടക്കാല സർക്കാർ മേധാവിയായ ഡോ. മുഹമ്മദ് യൂനുസ് "തീവ്രവാദത്തെ സഹായിച്ച കൊലയാളിയും ജനക്കൂട്ട നീതിയുടെ പിതാവുമാണ്" എന്നും ഇവർ ആരോപിക്കുന്നു.
സെർവറുകളിൽ നിന്നും സോഷ്യൽ മീഡിയയിൽ നിന്നുമുള്ള ഡിജിറ്റൽ ഡാറ്റയുടെ ഫോറൻസിക് വിശകലനം ഉൾപ്പെടെയുള്ള അന്വേഷണം പൂർത്തിയാക്കിയ ശേഷമാണ്, ഷെയ്ഖ് ഹസീന ഉൾപ്പെടെ 286 പേർക്കെതിരെ സിഐഡി കുറ്റപത്രം സമർപ്പിച്ചത്. വ്യാഴാഴ്ച, ധാക്ക മെട്രോപൊളിറ്റൻ മജിസ്‌ട്രേറ്റ് കോടതി ജഡ്ജി അരിഫുൾ ഇസ്ലാം ഹസീന ഉൾപ്പെടെ 260 പേരെ ഒളിവിൽ കഴിയുന്നതായി പ്രഖ്യാപിക്കുകയും നോട്ടീസ് പ്രസിദ്ധീകരിക്കാൻ ഉത്തരവിടുകയും ചെയ്തിരുന്നു.
Summary: Bangladesh's Criminal Investigation Department (CID) has declared ousted Prime Minister Sheikh Hasina and 260 others as fugitives in a sedition case linked to the "Joy Bangla Brigade."