കാൻബറ: ബോംബ് ഭീഷണിയെത്തുടർന്ന് ഓസ്ട്രേലിയൻ പ്രധാനമന്ത്രി ആന്റണി ആൽബനീസിനെ ചൊവ്വാഴ്ച വൈകുന്നേരം കാൻബറയിലെ ഔദ്യോഗിക വസതിയായ ‘ദ ലോഡ്ജിൽ’ നിന്ന് അടിയന്തരമായി മാറ്റി (Anthony Albanese Bomb Threat). വൈകുന്നേരം 6 മണിയോടെയാണ് സുരക്ഷാ ഉദ്യോഗസ്ഥർ പ്രധാനമന്ത്രിയെ സുരക്ഷിത സ്ഥാനത്തേക്ക് മാറ്റിയത്.
ഓസ്ട്രേലിയൻ ഫെഡറൽ പോലീസ് (AFP) വസതിയിൽ സമഗ്രമായ പരിശോധന നടത്തി. സ്ഫോടകവസ്തുവിനെക്കുറിച്ചുള്ള ഭീഷണി പ്രാദേശിക മാധ്യമങ്ങൾ റിപ്പോർട്ട് ചെയ്തിരുന്നു. മൂന്ന് മണിക്കൂറോളം നീണ്ട തിരച്ചിലിനൊടുവിൽ സംശയാസ്പദമായ ഒന്നും കണ്ടെത്താനായില്ല. തുടർന്ന് രാത്രി 9 മണിയോടെ പ്രധാനമന്ത്രിക്ക് വസതിയിലേക്ക് മടങ്ങാൻ അനുമതി നൽകി. നിലവിൽ ഭീഷണി നിലനിൽക്കുന്നില്ലെന്ന് പോലീസ് പ്രസ്താവനയിൽ വ്യക്തമാക്കി.
സമീപ മാസങ്ങളിൽ ഓസ്ട്രേലിയയിലെ ജനപ്രതിനിധികൾക്ക് നേരെയുള്ള ഭീഷണികൾ വർദ്ധിച്ചുവരുന്ന പശ്ചാത്തലത്തിലാണ് ഈ സംഭവം. രാഷ്ട്രീയക്കാർക്കും സർക്കാർ ഉദ്യോഗസ്ഥർക്കും എതിരെയുള്ള അതിക്രമങ്ങൾ തടയാൻ കഴിഞ്ഞ വർഷം പ്രത്യേക അന്വേഷണ സംഘങ്ങൾ രൂപീകരിച്ചിരുന്നു. പ്രധാനമന്ത്രിയും നിരവധി ഫെഡറൽ എംപിമാരും നിരന്തരം ഭീഷണികൾ നേരിടുന്നതിനാൽ പൊതുപരിപാടികളിൽ സുരക്ഷ കർശനമാക്കിയിരിക്കുകയാണ്.
Story Summary: Australian PM Anthony Albanese was evacuated from his official residence, ‘The Lodge’, on Tuesday evening following a bomb threat. AFP conducted a thorough search but found no suspicious items. The PM returned to the residence after 9 PM. Authorities have raised concerns over increasing threats to elected officials.
