കാൻബെറ: മിഡിൽ ഈസ്റ്റിൽ തുടരുന്ന യുദ്ധസാഹചര്യങ്ങൾ കണക്കിലെടുത്ത് ഇറാൻ പൗരന്മാർക്ക് ഓസ്ട്രേലിയ താൽക്കാലിക യാത്രാവിലക്ക് ഏർപ്പെടുത്തി ( Australia Iran Visitor Ban). സന്ദർശക വിസയിൽ എത്തുന്ന ഇറാൻ പൗരന്മാർ വിസ കാലാവധി കഴിഞ്ഞതിന് ശേഷം തിരിച്ചുപോകാൻ വിസമ്മതിക്കാനോ അല്ലെങ്കിൽ നിലവിലെ യുദ്ധം കാരണം അവർക്ക് മടങ്ങിപ്പോകാൻ കഴിയാതെ വരാനോ സാധ്യതയുണ്ടെന്ന് ചൂണ്ടിക്കാട്ടിയാണ് ഈ നടപടി. ആറ് മാസത്തേക്കാണ് ഈ നിയന്ത്രണം ഏർപ്പെടുത്തിയിരിക്കുന്നതെന്നും ഇത് ഓസ്ട്രേലിയയുടെ ‘ദേശീയ താല്പര്യം’ മുൻനിർത്തിയുള്ള തീരുമാനമാണെന്നും ആഭ്യന്തര മന്ത്രാലയം വ്യക്തമാക്കി. നിലവിൽ ഓസ്ട്രേലിയക്ക് പുറത്തുള്ളവർക്ക്, അവർക്ക് സന്ദർശക വിസ ഉണ്ടെങ്കിൽ പോലും ഈ കാലയളവിൽ രാജ്യത്തേക്ക് പ്രവേശിക്കാൻ അനുവാദമുണ്ടാകില്ല.
അതേസമയം, ഓസ്ട്രേലിയൻ പൗരന്മാരുടെ പങ്കാളികൾ, കുട്ടികൾ, നിലവിൽ ഓസ്ട്രേലിയയിൽ ഉള്ളവർ, സ്ഥിരതാമസ വിസയുള്ളവർ എന്നിവർക്ക് ഈ വിലക്ക് ബാധകമല്ല. ഓസ്ട്രേലിയൻ പൗരന്മാരുടെ മാതാപിതാക്കളുടെ അപേക്ഷകൾ പ്രത്യേകമായി പരിഗണിക്കുമെന്നും സർക്കാർ അറിയിച്ചു. എന്നാൽ, സർക്കാരിന്റെ ഈ നീക്കത്തിനെതിരെ മനുഷ്യാവകാശ സംഘടനകളും അഭയാർത്ഥി സംരക്ഷണ ഗ്രൂപ്പുകളും രംഗത്തെത്തിയിട്ടുണ്ട്. മാനുഷിക പ്രതിസന്ധി നേരിടുന്ന ഘട്ടത്തിൽ സുരക്ഷ തേടി എത്തുന്നവർക്ക് മുന്നിൽ വാതിലുകൾ അടയ്ക്കുന്നത് ലജ്ജാകരമാണെന്ന് അവർ ആരോപിച്ചു. ക്വീൻസ്ലൻഡിൽ നടന്ന ഏഷ്യൻ കപ്പ് ഫുട്ബോൾ മത്സരത്തിനിടെ ഇറാനിയൻ വനിതാ ടീമിലെ ചില അംഗങ്ങൾ ഓസ്ട്രേലിയയിൽ അഭയം തേടിയതിന് പിന്നാലെയാണ് വിസ നിയമങ്ങൾ കടുപ്പിക്കാൻ സർക്കാർ തീരുമാനിച്ചത്.
Summary
Australia has imposed a temporary six-month ban on visitors from Iran, citing “national interest” amid the ongoing Middle East war. The Department of Home Affairs explained that the conflict increases the risk of Iranian visitors being unable or unwilling to return home after their visas expire. The ban applies to those currently outside Australia, including visa holders, but exempts permanent residents and immediate family members of Australian citizens.
