ഇറാൻ കത്തുന്നു: സൊലൈമാനിയുടെ പ്രതിമ തകർത്തു, രാജ്യം മുഴുവൻ ഇന്റർനെറ്റ് വിച്ഛേദിച്ചു; പ്രക്ഷോഭം ആളിക്കത്താൻ കാരണമായ 5 പ്രധാന ഘടകങ്ങൾ | Iran Unrest

ടെഹ്‌റാൻ: ഇറാനിൽ ഭരണകൂടത്തിനെതിരായ ജനകീയ പ്രക്ഷോഭം അതീവ ഗുരുതരമായ സാഹചര്യത്തിലേക്ക് നീങ്ങുന്നു (Iran Unrest). സാമ്പത്തിക തകർച്ചയ്ക്കും മതനേതൃത്വത്തിന്റെ അടിച്ചമർത്തലിനുമെതിരെ ആരംഭിച്ച് രണ്ടാഴ്ച പിന്നിടുന്ന സമരത്തിൽ ഇതുവരെ 42-ലധികം പേർ കൊല്ലപ്പെട്ടതായാണ് റിപ്പോർട്ടുകൾ. വ്യാഴാഴ്ച രാത്രി രാജ്യത്തുടനീളം ഇന്റർനെറ്റ് സേവനങ്ങൾ അധികൃതർ വിച്ഛേദിച്ചു. നിലവിലെ സാഹചര്യത്തെക്കുറിച്ചുള്ള 5 പ്രധാന കാര്യങ്ങൾ താഴെ നൽകുന്നു:

1. സൊലൈമാനിയുടെ പ്രതിമ തകർത്തു: ഇറാനിലെ റെവല്യൂഷണറി ഗാർഡിന്റെ പ്രമുഖ നേതാവായിരുന്ന ഖാസിം സൊലൈമാനിയുടെ പ്രതിമ തെക്കൻ പ്രവിശ്യയായ ഫാർസിൽ പ്രക്ഷോഭകാരികൾ തകർത്തു. ഇത് ഇറാനിയൻ ഭരണകൂടത്തോടുള്ള കടുത്ത അമർഷത്തിന്റെ സൂചനയായാണ് വിലയിരുത്തപ്പെടുന്നത്.

2. രസ പഹ്‌ലവിയുടെ ആഹ്വാനം: പ്രവാസത്തിലുള്ള ഇറാനിയൻ കിരീടാവകാശി രസ പഹ്‌ലവി നടത്തിയ ആഹ്വാനത്തെത്തുടർന്നാണ് വ്യാഴാഴ്ച രാത്രി പ്രതിഷേധം ഇരമ്പിയത്. 'പഹ്‌ലവി മടങ്ങിവരും', 'ഖമേനി പുറത്തുപോവുക' തുടങ്ങിയ മുദ്രാവാക്യങ്ങൾ തെരുവുകളിൽ മുഴങ്ങി.

3. ഇന്റർനെറ്റ് ബ്ലാക്ക് ഔട്ട്: സമരം ഏകോപിപ്പിക്കുന്നത് തടയാൻ ഇറാനിയൻ സർക്കാർ രാജ്യത്തുടനീളം ഇന്റർനെറ്റും ടെലിഫോൺ സേവനങ്ങളും വിച്ഛേദിച്ചു. ഇതേത്തുടർന്ന് വിവരങ്ങൾ പുറംലോകമറിയാൻ വലിയ തടസ്സങ്ങൾ നേരിടുന്നുണ്ട്.

4. ട്രംപിന്റെ താക്കീത്: സമാധാനപരമായി പ്രതിഷേധിക്കുന്നവർക്കെതിരെ ഇറാൻ സൈനിക നടപടി സ്വീകരിച്ചാൽ അമേരിക്ക ശക്തമായി തിരിച്ചടിക്കുമെന്ന് പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകി. അമേരിക്കൻ സൈന്യം ഏത് സാഹചര്യവും നേരിടാൻ സജ്ജമാണെന്ന് അദ്ദേഹം എക്സ് പോസ്റ്റിലൂടെ വ്യക്തമാക്കി.

5. സാമ്പത്തിക തകർച്ച: ഇറാനിയൻ കറൻസിയായ 'റിയാലിന്റെ' മൂല്യം കുത്തനെ ഇടിഞ്ഞതും 42 ശതമാനത്തിലധികം ഉയർന്ന പണപ്പെരുപ്പവുമാണ് ജനങ്ങളെ തെരുവിലിറക്കിയത്. ഇതിനോടകം ഇറാനിലെ 31 പ്രവിശ്യകളിലേക്കും സമരം വ്യാപിച്ചുകഴിഞ്ഞു.