കാബൂൾ: അഫ്ഗാനിസ്ഥാനിൽ താലിബാൻ ഭരണകൂടം വീണ്ടും പരസ്യ വധശിക്ഷ നടപ്പാക്കി. ഒരു കുടുംബത്തിലെ 13 പേരെ കൊലപ്പെടുത്തിയ കേസിൽ ശിക്ഷിക്കപ്പെട്ട പ്രതിയെയാണ്, ഏകദേശം 80,000ത്തോളം ജനങ്ങൾ നോക്കിനിൽക്കെ ഖോസ്റ്റിലെ സ്റ്റേഡിയത്തിൽ വെച്ച് വധിച്ചത്. മംഗൾ എന്ന വ്യക്തിയെയാണ് വധശിക്ഷയ്ക്ക് വിധേയനാക്കിയത്. കൊല്ലപ്പെട്ടവരുടെ കുടുംബാംഗമായ ഒരു പതിമൂന്നുകാരനാണ് വെടിവെച്ചു കൊന്നതെന്നാണ് റിപ്പോർട്ടുകൾ സൂചിപ്പിക്കുന്നത്. പ്രതി കുറ്റക്കാരനാണെന്ന് അഫ്ഗാനിസ്ഥാൻ സുപ്രീം കോടതി കണ്ടെത്തുകയും, താലിബാൻ പരമോന്നത നേതാവ് ഹിബത്തുള്ള അഖുൻഡ്സാദ വധശിക്ഷയ്ക്ക് അംഗീകാരം നൽകുകയും ചെയ്തിരുന്നു.
മംഗളിനൊപ്പം കേസിൽ പ്രതികളായി ശിക്ഷിക്കപ്പെട്ട മറ്റ് രണ്ട് പേരുടെ (മക്കളെന്ന് കരുതപ്പെടുന്നു) വധശിക്ഷ താൽക്കാലികമായി മാറ്റിവെച്ചിട്ടുണ്ട്. ഇരകളുടെ കുടുംബത്തിലെ ചില അവകാശികൾ വിദേശത്തായതിനാൽ, അവർ ഹാജരാകുന്നത് വരെ ശിക്ഷ നടപ്പാക്കുന്നത് മാറ്റിവെച്ചതായി കോടതി അറിയിച്ചു.
2021-ൽ താലിബാൻ അധികാരം പിടിച്ചെടുത്ത ശേഷം രാജ്യത്ത് നടക്കുന്ന 11-ാമത്തെ വധശിക്ഷയാണിത്. ശരീഅത്ത് നിയമങ്ങൾ രാജ്യത്ത് തിരികെ വരുന്നതിൻ്റെ സൂചന കൂടിയാണ് ഈ നടപടി. പരസ്യ വധശിക്ഷ നടപ്പാക്കുന്നതിന് തൊട്ടുമുമ്പ് ഐക്യരാഷ്ട്രസഭയുടെ അഫ്ഗാനിസ്ഥാനിലെ പ്രത്യേക റിപ്പോർട്ടർ റിച്ചാർഡ് ബെന്നറ്റ് ഇത് തടയണമെന്ന് ആവശ്യപ്പെട്ടിരുന്നു. പരസ്യ വധശിക്ഷകൾ മനുഷ്യത്വരഹിതവും ക്രൂരവുമാണ്, അന്താരാഷ്ട്ര നിയമങ്ങൾക്ക് വിരുദ്ധവുമാണ്. ഇത്തരം വധശിക്ഷകൾ മനുഷ്യാവകാശങ്ങളുടെയും അന്തസ്സിൻ്റെയും കടുത്ത ലംഘനമാണെന്നും ഇത് ഇസ്ലാമിക നിയമങ്ങൾക്ക് യോജിച്ചതല്ലെന്നും അദ്ദേഹം വ്യക്തമാക്കി.