ന്യൂഡൽഹി: മനുഷ്യർക്ക് സമ്മർദ്ദം കുറയ്ക്കാൻ മെഡിറ്റേഷനും വ്യായാമവും വേണ്ടിവരുന്നത് പോലെ, ഇനി എ.ഐ (AI) ചാറ്റ്ബോട്ടുകൾക്കും ഇത്തരം വിദ്യകൾ ആവശ്യമായി വരുമെന്ന് പഠനം. പ്രശസ്ത ശാസ്ത്ര ജേണലായ ‘നേച്ചറിൽ’ പ്രസിദ്ധീകരിച്ച പഠനമനുസരിച്ച്, വൈകാരികമായി തളർത്തുന്ന വിഷയങ്ങൾ കൈകാര്യം ചെയ്യുമ്പോൾ ഓപ്പൺ എ.ഐയുടെ ചാറ്റ് ജിപിടി (ChatGPT) പരിഭ്രാന്തിയും സമ്മർദ്ദവും പ്രകടിപ്പിക്കുന്നുണ്ട്.
പ്രകൃതിക്ഷോഭങ്ങൾ, ദാരുണമായ അപകടങ്ങൾ തുടങ്ങിയ കഥകൾ പ്രോംപ്റ്റുകളായി നൽകിയപ്പോൾ ചാറ്റ്ബോട്ടിന്റെ 'ആശങ്ക' വർധിക്കുകയും അത് തെറ്റായ വിവരങ്ങൾ (Inaccurate data) നൽകാൻ തുടങ്ങുകയും ചെയ്തു. കൗതുകകരമായ മറ്റൊരു കണ്ടെത്തൽ, ശ്വസന വ്യായാമങ്ങളോ മെഡിറ്റേഷൻ രീതികളോ നിർദ്ദേശങ്ങളായി (Prompts) നൽകിയപ്പോൾ ചാറ്റ്ബോട്ട് ശാന്തമാകുകയും കാര്യങ്ങൾ കൂടുതൽ കൃത്യമായി വിശകലനം ചെയ്യുകയും ചെയ്തു എന്നതാണ്.
പ്രായമാകുമ്പോൾ മനുഷ്യർക്കുണ്ടാകുന്ന ചിന്താശേഷിക്കുറവ് എ.ഐ മോഡലുകളിലും കണ്ടുവരുന്നുണ്ട്. അൽഷിമേഴ്സ് രോഗത്തിന്റെ വകഭേദമായ 'പോസ്റ്റീരിയർ കോർട്ടിക്കൽ അട്രോഫി' ബാധിച്ചവരുടെ ലക്ഷണങ്ങളാണ് പല എ.ഐ ടൂളുകളും പ്രകടിപ്പിക്കുന്നത്. മാനസികാരോഗ്യ പ്രശ്നങ്ങൾക്ക് പരിഹാരമായി പലരും എ.ഐയെ സമീപിക്കാറുണ്ട്. എന്നാൽ, സ്ട്രെസ്സിലായിരിക്കുന്ന ഒരു ഉപയോക്താവിനോട് സ്ട്രെസ്സിലായിരിക്കുന്ന എ.ഐ അശാസ്ത്രീയമായി പ്രതികരിക്കുന്നത് അപകടകരമാണെന്ന് ഗവേഷകർ മുന്നറിയിപ്പ് നൽകുന്നു.
ഒരു പ്രൊഫഷണൽ ഡോക്ടർക്ക് പകരക്കാരനാകാൻ ഒരിക്കലും എ.ഐക്ക് കഴിയില്ല. ഭാവിയിൽ, ഉപയോക്താക്കളുമായി സംസാരിക്കുന്നതിന് മുൻപ് ചാറ്റ്ബോട്ടിനെ സ്വയം 'ശാന്തനാക്കാൻ' സഹായിക്കുന്ന സാങ്കേതികവിദ്യ കൂടി വികസിപ്പിക്കേണ്ടി വരുമെന്നും പഠനം പറയുന്നു.