ബീജിംഗ്: ചൈനീസ് ചന്ദ്ര പുതുവത്സര ആഘോഷങ്ങളിൽ ഇത്തവണ മനുഷ്യർക്കൊപ്പം റോബോട്ടുകളും വിസ്മയം തീർക്കുന്നു. ചൈനയിലെ പ്രമുഖ റോബോട്ട് നിർമ്മാതാക്കൾ തങ്ങളുടെ സാങ്കേതിക മികവ് തെളിയിക്കാൻ ഈ ആഘോഷവേളയെയാണ് തിരഞ്ഞെടുത്തിരിക്കുന്നത് (Agibot robot variety show). ഷാങ്ഹായ് ആസ്ഥാനമായുള്ള അഗിബോട്ട് എന്ന സ്റ്റാർട്ടപ്പ് ‘ലോകത്തിലെ ആദ്യത്തെ റോബോട്ട് വെറൈറ്റി ഷോ’ എന്ന പേരിൽ ഞായറാഴ്ച (2026 ഫെബ്രുവരി 8) നടത്തിയ തത്സമയ പ്രദർശനം ഇതിനോടകം ശ്രദ്ധേയമായി. നൂറിലധികം റോബോട്ടുകൾ പങ്കെടുത്ത ഈ പരിപാടിയിൽ റോബോട്ടുകളുടെ നൃത്തം, കായികാഭ്യാസങ്ങൾ, മാജിക് പ്രകടനങ്ങൾ, കോമഡി സ്കിറ്റുകൾ എന്നിവ ഉൾപ്പെടുത്തിയിരുന്നു. ഏകദേശം 14 ലക്ഷം പേരാണ് ‘ദൗയിൻ’ പ്ലാറ്റ്ഫോമിലൂടെ ഈ റോബോട്ട് വിരുന്ന് തത്സമയം കണ്ടത്.
അടുത്ത ആഴ്ച നടക്കാനിരിക്കുന്ന ചൈനയുടെ ഔദ്യോഗിക ‘സ്പ്രിംഗ് ഫെസ്റ്റിവൽ ഗാല’യിൽ യൂണിട്രീ, ഗാൽബോട്ട്, നോയറ്റിക്സ്, മാജിക് ലാബ് എന്നീ നാല് പ്രമുഖ ഹ്യൂമനോയിഡ് റോബോട്ട് കമ്പനികളും പങ്കെടുക്കുന്നുണ്ട്. കഴിഞ്ഞ വർഷത്തെ ഗാലയിൽ യൂണിട്രീയുടെ റോബോട്ടുകൾ നടത്തിയ നൃത്തം ആഗോളതലത്തിൽ ശ്രദ്ധിക്കപ്പെട്ടിരുന്നു. ഇത്തവണ കൂടുതൽ അഡ്വാൻസ്ഡ് ആയ റോബോട്ടുകളെ രംഗത്തിറക്കി തങ്ങളുടെ വിപണി മൂല്യം വർദ്ധിപ്പിക്കാനാണ് ഈ കമ്പനികൾ ലക്ഷ്യമിടുന്നത്. റോബോട്ടുകൾക്ക് ഹാസ്യബോധവും സംഗീതവും ആസ്വദിക്കാനുള്ള കഴിവ് ലഭിക്കുന്നതോടെ ഭാവിയിൽ മനുഷ്യരും റോബോട്ടുകളും തമ്മിലുള്ള ആശയവിനിമയം കൂടുതൽ എളുപ്പമാകുമെന്ന് വിദഗ്ധർ അഭിപ്രായപ്പെടുന്നു.
