ദുബായ്: സൗദി അറേബ്യയും യുഎഇയും തമ്മിലുള്ള നയതന്ത്ര ഭിന്നതയെത്തുടർന്ന് യെമനിലെ ഏഡൻ അന്താരാഷ്ട്ര വിമാനത്താവളം വ്യാഴാഴ്ച അടച്ചു (Aden Airport Shutdown). വിമാന സർവീസുകൾ നിർത്തിവെച്ചതോടെ രോഗികളും പ്രായമായവരും ഉൾപ്പെടെ നൂറുകണക്കിന് യാത്രക്കാരാണ് വിമാനത്താവളത്തിൽ കുടുങ്ങിയത്. ഹൂതി നിയന്ത്രണത്തിലല്ലാത്ത യെമൻ പ്രദേശങ്ങളിലെ പ്രധാന കവാടമാണ് ഏഡൻ.
യുഎഇയിലേക്കുള്ള വിമാന സർവീസുകൾക്ക് സൗദി അറേബ്യ നിയന്ത്രണം ഏർപ്പെടുത്തിയതാണ് പെട്ടെന്നുള്ള പ്രകോപനത്തിന് കാരണം. ഏഡനിൽ നിന്നുള്ള എല്ലാ വിമാനങ്ങളും പരിശോധനയ്ക്കായി സൗദി വഴി പോകണമെന്ന് റിയാദ് നിർദ്ദേശിച്ചു. ഇതിനെ യുഎഇ പിന്തുണയുള്ള സതേൺ ട്രാൻസിഷണൽ കൗൺസിൽ എതിർത്തതോടെയാണ് പ്രതിസന്ധി രൂക്ഷമായത്. യെമനിലെ ഔദ്യോഗിക സർക്കാരിനെ സൗദി പിന്തുണയ്ക്കുമ്പോൾ, വിഘടനവാദികളായ എസ്ടിസി ഗ്രൂപ്പിനെയാണ് യുഎഇ പിന്തുണയ്ക്കുന്നത്. കഴിഞ്ഞ മാസം ദക്ഷിണ യെമനിലെ പ്രധാന ഭാഗങ്ങൾ എസ്ടിസി പിടിച്ചെടുത്തത് സൗദിയെ പ്രകോപിപ്പിച്ചു.
സൗദി അറേബ്യ വ്യോമ ഉപരോധം ഏർപ്പെടുത്തിയെന്ന് യെമനിലെ ഗതാഗത മന്ത്രാലയം ആരോപിച്ചു. എന്നാൽ യെമൻ സർക്കാരാണ് നിയന്ത്രണങ്ങൾ ഏർപ്പെടുത്തിയതെന്ന് സൗദി വൃത്തങ്ങൾ വിശദീകരിക്കുന്നു. തർക്കം രൂക്ഷമായതിനെത്തുടർന്ന് യെമനിൽ അവശേഷിക്കുന്ന തങ്ങളുടെ സൈന്യത്തെ പിൻവലിക്കുമെന്ന് യുഎഇ പ്രഖ്യാപിച്ചിട്ടുണ്ട്. സൗദിയുടെ ദേശീയ സുരക്ഷയ്ക്ക് ഭീഷണിയുണ്ടായാൽ നോക്കി നിൽക്കില്ലെന്ന് റിയാദ് മുന്നറിയിപ്പ് നൽകിയതിന് പിന്നാലെയാണിത്. യുദ്ധം തകർത്ത യെമനിൽ രണ്ട് പ്രധാന അറബ് രാജ്യങ്ങൾ തമ്മിലുള്ള ഈ അകൽച്ച മേഖലയിലെ സമാധാന ശ്രമങ്ങൾക്ക് വലിയ തിരിച്ചടിയാകുമെന്നാണ് വിലയിരുത്തപ്പെടുന്നത്.
Yemen's Aden International Airport was shut down on Thursday as tensions escalated between Saudi Arabia and the United Arab Emirates. The closure followed a row over flight restrictions imposed by Saudi Arabia on trips between Aden and the UAE. The rift highlights the deepening divide between the two Gulf allies over their conflicting support for Yemen's government and southern separatists, leaving hundreds of passengers stranded.