ബാങ്കോക്ക്: തായ്ലൻഡിൽ സംസ്കരിക്കുന്നതിനായി ക്ഷേത്ര പരിസരത്ത് എത്തിച്ച സ്ത്രീയുടെ 'മൃതദേഹത്തിൽ' അസാധാരണമായ ചലനം. ബാങ്കോക്കിൽ നിന്ന് അധികം അകലെയല്ലാത്ത നോന്തബുരി പ്രവിശ്യയിലെ വാറ്റ് റാറ്റ് പ്രഖോംഗ് താം എന്ന ബുദ്ധ ക്ഷേത്രത്തിലാണ് നാടകീയമായ സംഭവം അരങ്ങേറിയത്. സംഭവത്തിൻ്റെ ദൃശ്യങ്ങൾ ക്ഷേത്രം തന്നെയാണ് പുറത്തുവിട്ടത്. ശവമഞ്ചത്തിൽ കിടത്തിയിരുന്ന 65 വയസ്സുള്ള സ്ത്രീ തലയും കൈകളും അനക്കാൻ ശ്രമിക്കുന്നതാണ് വീഡിയോയിലുള്ളത്.(A body brought for burial suddenly came to life at a Buddhist temple in Thailand)
ഫിറ്റ്സാനുലോക് പ്രവിശ്യയിൽ നിന്നുള്ള 65കാരിയെ സഹോദരനാണ് സംസ്കാരത്തിനായി ക്ഷേത്രത്തിലെത്തിച്ചത്. കഴിഞ്ഞ രണ്ട് വർഷമായി കിടപ്പുരോഗിയായിരുന്നു ഇവർ. "രണ്ട് ദിവസം മുൻപ് ഇവർക്ക് തികച്ചും അനക്കമില്ലാത്ത അവസ്ഥയായി. ശ്വാസമെടുക്കുകയോ പ്രതികരിക്കുകയോ ചെയ്യാതെ വന്നതോടെ സഹോദരി മരിച്ചുവെന്ന് കരുതി," ക്ഷേത്രത്തിന്റെ സാമ്പത്തിക കാര്യ മാനേജരും ജനറലുമായ പെയ്റാറ്റ്സൂദ്ഹൂപ്പ് മാധ്യമങ്ങളോട് വിശദീകരിച്ചു.
സഹോദരിയെ ബാങ്കോക്കിലെ ആശുപത്രിയിൽ എത്തിച്ചു. എന്നാൽ താമസസ്ഥലത്തുനിന്ന് 500 കിലോമീറ്റർ അകലെയുള്ള ഈ ആശുപത്രി, മരണ സർട്ടിഫിക്കറ്റ് ഇല്ലാത്തതിനാൽ മൃതദേഹം സ്വീകരിക്കാൻ തയ്യാറായില്ല. ഇതിനെത്തുടർന്നാണ് സൗജന്യമായി സംസ്കരിക്കുന്ന ഈ ബുദ്ധ ക്ഷേത്രത്തിൽ പിക്ക് അപ്പ് ട്രക്കിൽ മൃതദേഹവുമായി സഹോദരൻ എത്തിയത്. ക്ഷേത്രത്തിൽ മരണ സർട്ടിഫിക്കറ്റില്ലാതെ സംസ്കാരം നടത്താനാവില്ലെന്ന് അധികൃതർ സഹോദരനെ അറിയിക്കുകയും സർട്ടിഫിക്കറ്റ് ലഭിക്കുന്നതിനായുള്ള നടപടിക്രമങ്ങൾ വിശദീകരിക്കുകയും ചെയ്യുന്നതിനിടയിലാണ് സംഭവം.
"ശവപ്പെട്ടി തുറന്ന് നോക്കാൻ ഞങ്ങൾ നിർദ്ദേശിച്ചു. തുറന്നു നോക്കിയപ്പോൾ എല്ലാവരും ഭയന്നുപോയി. കണ്ണുകൾ തുറന്നു പിടിച്ച് ശവപ്പെട്ടിയുടെ വശത്ത് ഇടിക്കാൻ ശ്രമിക്കുന്ന സ്ത്രീയെയാണ് കാണാൻ സാധിച്ചത്." ഉടൻ തന്നെ 65കാരിക്ക് ജീവൻ നഷ്ടമായിട്ടില്ലെന്ന് വ്യക്തമായി. അധികം വൈകാതെ ഇവരെ ആശുപത്രിയിലേക്ക് മാറ്റുകയും ചെയ്തു. ചികിത്സാ ചെലവ് ക്ഷേത്രം വഹിക്കുമെന്നും അധികൃതർ അറിയിച്ചു.