ടെഹ്റാൻ: സാമ്പത്തിക പ്രതിസന്ധിയിൽ ആരംഭിച്ച് ഭരണകൂട വിരുദ്ധ പ്രക്ഷോഭമായി മാറിയ ജനകീയ പ്രക്ഷോഭത്തിൽ ഇറാൻ ആളിപ്പടരുന്നു. കഴിഞ്ഞ ദിവസങ്ങളിൽ നടന്ന സംഘർഷങ്ങളിൽ 42 പേർ കൊല്ലപ്പെട്ടതായാണ് മനുഷ്യാവകാശ സംഘടന റിപ്പോർട്ട് ചെയ്യുന്നത്. സ്ഥിതിഗതികൾ നിയന്ത്രണാതീതമായതോടെ രാജ്യത്ത് സമ്പൂർണ്ണ ഇന്റർനെറ്റ് നിരോധനം ഏർപ്പെടുത്തിയിരിക്കുകയാണ്.(42 dead in protests in Iran, internet shut down)
ടെഹ്റാൻ ബസാറിൽ തുടങ്ങിയ പ്രതിഷേധം ഇസ്ഫഹാൻ, അബാദാൻ തുടങ്ങിയ പ്രധാന നഗരങ്ങളിലേക്ക് പടർന്നു. ഇസ്ഫഹാനിൽ റെവല്യൂഷണറി ഗാർഡിന്റെ കെട്ടിടം പ്രതിഷേധക്കാർ തീയിട്ട് നശിപ്പിച്ചു. ടെഹ്റാനിൽ പ്രക്ഷോഭകരെ നേരിടാനെത്തിയ സുരക്ഷാ ഉദ്യോഗസ്ഥർക്ക് ജനക്കൂട്ടത്തിന്റെ ആക്രോശത്തിന് മുന്നിൽ പിൻവാങ്ങേണ്ടി വന്നു. ഉദ്യോഗസ്ഥരുടെ വാഹനങ്ങൾ പ്രതിഷേധക്കാർ അഗ്നിക്കിരയാക്കി.
ഇതുവരെ 2,270-ലധികം ആളുകളെ സുരക്ഷാസേന കസ്റ്റഡിയിലെടുത്തതായാണ് വിവരം. എന്നാൽ 21 മരണങ്ങൾ മാത്രമേ സർക്കാർ ഔദ്യോഗികമായി സ്ഥിരീകരിച്ചിട്ടുള്ളൂ. പ്രതിഷേധക്കാർ സംഘടിക്കുന്നത് തടയാൻ വ്യാഴാഴ്ച രാത്രി മുതൽ രാജ്യവ്യാപകമായി ഇന്റർനെറ്റും അന്താരാഷ്ട്ര ടെലിഫോൺ ലൈനുകളും വിച്ഛേദിച്ചു. ഇതിനെതിരെ ആംനസ്റ്റി ഇന്റർനാഷണൽ രംഗത്തുവന്നു. സുരക്ഷാസേന പ്രതിഷേധക്കാർക്കെതിരെ മാരകായുധങ്ങൾ പ്രയോഗിക്കുന്നുണ്ടെന്ന് സംഘടന കുറ്റപ്പെടുത്തി.
നാടുകടത്തപ്പെട്ട ഇറാനിയൻ രാജകുമാരൻ റെസ പഹ്ലവി പ്രക്ഷോഭത്തിന് പൂർണ്ണ പിന്തുണ പ്രഖ്യാപിച്ചു. ഇറാനിലെ യുവാക്കളെ 'വിജയത്തിന്റെ തലമുറ' എന്ന് വിശേഷിപ്പിച്ച അദ്ദേഹം, ബാരിക്കേഡുകൾ തകർത്ത് തെരുവുകൾ കീഴടക്കാൻ ആഹ്വാനം ചെയ്തു. ജനങ്ങൾക്ക് ഇന്റർനെറ്റ് ലഭ്യമാക്കാൻ ലോകരാജ്യങ്ങൾ ഇടപെടണമെന്നും അദ്ദേഹം അഭ്യർത്ഥിച്ചു.
വിദേശ ശത്രുക്കൾ വാടകയ്ക്കെടുത്തവരാണ് പ്രക്ഷോഭത്തിന് പിന്നിലെന്ന് പരമോന്നത നേതാവ് ആയത്തുള്ള അലി ഖമനേയി ആരോപിച്ചു. എന്നാൽ പ്രതിഷേധക്കാർക്കെതിരെ അതിക്രമം തുടർന്നാൽ ശക്തമായി നേരിടുമെന്ന് യുഎസ് പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകി. ജർമ്മനിയും ഇറാനിലെ നടപടികളെ അപലപിച്ചു. ഇറാനിയൻ കറൻസിയായ റിയാലിന്റെ മൂല്യം ഇടിഞ്ഞതും പണപ്പെരുപ്പം വർദ്ധിച്ചതുമാണ് ജനങ്ങളെ തെരുവിലിറക്കിയത്. ഇപ്പോൾ ഭരണമാറ്റം എന്ന മുദ്രാവാക്യവുമായാണ് പ്രക്ഷോഭകർ മുന്നോട്ട് പോകുന്നത്.