ബീജിങ്: അഴിമതിയും സാമ്പത്തിക ക്രമക്കേടുകളും തെളിഞ്ഞതിനെത്തുടർന്ന് ചൈനയുടെ മുൻ പ്രതിരോധ മന്ത്രിമാരായ വേ ഫെംഗെയ്ക്കും ലി ഷാങ്ഫുവിനും ചൈനീസ് സൈനിക കോടതി വധശിക്ഷ വിധിച്ചു (China Defense Minister Death Sentence). രണ്ട് വർഷത്തെ സസ്പെൻഷനോടെയുള്ള വധശിക്ഷയാണ് (Death sentence with a two-year reprieve) ഇരുവർക്കും വിധിച്ചിരിക്കുന്നത്. ചൈനീസ് ഔദ്യോഗിക വാർത്താ ഏജൻസിയായ ഷിൻഹുവയാണ് ഈ വിവരം പുറത്തുവിട്ടത്.
ഔദ്യോഗിക പദവി ദുരുപയോഗം ചെയ്ത് വൻ തുകകളും വിലപിടിപ്പുള്ള വസ്തുക്കളും കൈക്കൂലിയായി സ്വീകരിച്ചുവെന്ന് അന്വേഷണ ഏജൻസികൾ കണ്ടെത്തി. ലി ഷാങ്ഫുവിനെതിരെ കൈക്കൂലി വാങ്ങിയതിനും നൽകിയതിനുമാണ് ശിക്ഷ. വേ ഫെംഗെ കൈക്കൂലി വാങ്ങിയതിനും ശിക്ഷിക്കപ്പെട്ടു.
രണ്ട് വർഷത്തെ കാലാവധിക്ക് ശേഷം ഈ വധശിക്ഷ സാധാരണയായി ജീവപര്യന്തം തടവായി മാറ്റപ്പെടാറാണ് പതിവ്. എങ്കിലും, രാഷ്ട്രീയ അവകാശങ്ങൾ ആജീവനാന്തം റദ്ദാക്കുകയും ഇവരുടെ സ്വത്തുക്കൾ കണ്ടുകെട്ടുകയും ചെയ്തിട്ടുണ്ട്.അഴിമതി ആരോപണങ്ങളെത്തുടർന്ന് 2024-ൽ തന്നെ ഇരുവരെയും ഭരണകക്ഷിയായ കമ്മ്യൂണിസ്റ്റ് പാർട്ടിയിൽ നിന്ന് പുറത്താക്കിയിരുന്നു.
ഷി ജിൻപിങ് അധികാരമേറ്റെടുത്തത് മുതൽ സൈന്യത്തിന് മേലുള്ള തന്റെ നിയന്ത്രണം ശക്തമാക്കാൻ നിരവധി നീക്കങ്ങൾ നടത്തിയിട്ടുണ്ട്. കഴിഞ്ഞ വർഷം മാത്രം സെൻട്രൽ മിലിട്ടറി കമ്മീഷൻ വൈസ് ചെയർമാൻ ഹേ വെയ്ഡോങ് ഉൾപ്പെടെ ഒമ്പത് മുതിർന്ന ജനറൽമാരെയാണ് അഴിമതി ആരോപിച്ച് പുറത്താക്കിയത്. ചൈനയുടെ റോക്കറ്റ് ഫോഴ്സ് (Rocket Force) ഉൾപ്പെടെയുള്ള നിർണ്ണായക വിഭാഗങ്ങളിൽ വൻതോതിൽ ക്രമക്കേടുകൾ നടന്നതായി റിപ്പോർട്ടുകൾ ഉണ്ടായിരുന്നു.
അഴിമതി തുടച്ചുനീക്കുക എന്നതിലുപരി, സൈന്യത്തിനുള്ളിലെ എതിർസ്വരങ്ങളെ അടിച്ചമർത്താനും തന്റെ അധികാരം ചോദ്യം ചെയ്യപ്പെടാത്ത വിധം ഉറപ്പിക്കാനുമാണ് ഷി ജിൻപിങ് ഇത്തരം കടുത്ത നടപടികളിലൂടെ ശ്രമിക്കുന്നതെന്ന് നിരീക്ഷകർ വിലയിരുത്തുന്നു. മുൻ വിദേശകാര്യ മന്ത്രി ചിൻ ഗാംഗ് ഉൾപ്പെടെയുള്ള പ്രമുഖർ നേരത്തെ ഇത്തരത്തിൽ അപ്രത്യക്ഷരാവുകയും പിന്നീട് സ്ഥാനങ്ങളിൽ നിന്ന് നീക്കപ്പെടുകയും ചെയ്തിരുന്നു.
Story Summary: Former Chinese Defense Ministers Wei Fenghe and Li Shangfu have been sentenced to death with a two-year reprieve by a military court on graft charges. Convicted of bribery and offering improper benefits, both were stripped of political rights and had their assets confiscated. This move is seen as a major escalation in President Xi Jinping’s ongoing anti-corruption purge within the People’s Liberation Army.
