കാട്ടുതീ കനത്ത നാശംവിതച്ച ലോസ് ഏഞ്ചല്‍സിലെ മേല്‍ക്കൂരകളിലും വാഹനങ്ങളിലും തെരുവുകളിലും തിളങ്ങുന്ന പിങ്ക് പൊടിയാണ് വ്യാപകമായി കാണാൻ കഴിയുന്നത്. കാട്ടുതീയെ ചെറുക്കാന്‍ എയര്‍ ടാങ്കറുകള്‍ ഈ പദാര്‍ഥം ഇവിടെ വിതറുന്നത് തുടരുകയാണ്. തീ പടരുന്നത് തടയാന്‍ കഴിഞ്ഞയാഴ്ച ആയിരക്കണക്കിന് ഗാലണ്‍ പൊടി എത്തിച്ചതായി അധികൃതര്‍ സ്ഥിരീകരിച്ചു.
1960-കള്‍ മുതല്‍ യുഎസിലുടനീളം വ്യാപകമായി ഉപയോഗിക്കുന്ന ഫയര്‍ റിട്ടാര്‍ഡന്റ് ആയ ഫോസ്-ചെക്ക് ആണ് ഈ പിങ്ക് നിറത്തിലെ പദാര്‍ഥം. പെരിമീറ്റര്‍ സൊല്യൂഷന്‍സ് എന്ന കമ്പനി നിര്‍മിച്ച ഇത്, ലോകത്ത് ഏറ്റവും കൂടുതല്‍ ഉപയോഗിക്കുന്ന ഫയര്‍ റിട്ടാര്‍ഡന്റാണ്. ഫോസ്-ചെക്കില്‍ ചേര്‍ത്ത ഡൈ, പൈലറ്റുമാര്‍ക്കും അഗ്നിശമന സേനാംഗങ്ങളും പൊടി തിരിച്ചറിയാനുള്ള അടയാളമായി പ്രവർത്തിക്കുന്നു. റിട്ടാര്‍ഡന്റ് എവിടെ വിന്യസിച്ചിട്ടുണ്ടെന്ന് കാണാന്‍ ഇത് ഉപകാരപ്പെടും. പൊടിയിൽ സൂര്യപ്രകാശം പതിക്കുമ്പോൾ നിറം മങ്ങുകയും പ്രകൃതിദത്തമായ മണ്ണിന്റെ നിറങ്ങളുമായി ലയിക്കുകയും ചെയ്യുന്നു.