വാഷിങ്ടൺ ഡി.സി: യുക്രെയ്ന് നേരെ റഷ്യ നടത്തിയ മിസൈൽ, ഡ്രോൺ ആക്രമണങ്ങളെ അപലപിച്ച് യു.എസ് പ്രസിഡന്റ് ജോ ബൈഡൻ. യുക്രെയ്നുള്ള അമേരിക്കയുടെ ഉറച്ച പിന്തുണ ബൈഡൻ ആവർത്തിച്ചു. (Joe Biden)
'ക്രിസ്മസ് പുലർച്ചെ, റഷ്യ യുക്രെയ്നിയൻ നഗരങ്ങൾക്കും പ്രധാന ഊർജോൽപ്പാദന കേന്ദ്രങ്ങൾക്കും നേരെ മിസൈലുകളും ഡ്രോണുകളും വിക്ഷേപിച്ചു. ശൈത്യകാലത്ത് യുക്രെയ്നിയൻ ജനതയുടെ വൈദ്യുതി വിച്ഛേദിക്കുകയും വിതരണ ഗ്രിഡിന്റെ സുരക്ഷ അപകടപ്പെടുത്തുകയും ചെയ്യുക എന്നതാണ് ഈ ക്രൂരമായ ആക്രമണത്തിന്റെ ഉദ്ദേശം' -ബൈഡൻ പറഞ്ഞു.
യുക്രെയ്ന് ആയുധ വിതരണം യു.എസ് പ്രതിരോധ വകുപ്പ് വർധിപ്പിക്കുമെന്നും യുക്രെയ്നൊപ്പം നിൽക്കാൻ അന്താരാഷ്ട്ര സമൂഹത്തോട് ആഹ്വാനം ചെയ്യുന്നതായും അദ്ദേഹം കൂട്ടിച്ചേർത്തു.