ഗാന്ധിനഗർ: ഗുജറാത്തിലെ വഡോദര ജില്ലയിൽ അഞ്ച് വയസ്സ് പ്രായമുള്ള മുതലയെ ക്രൂരമായി തല്ലിക്കൊന്ന സംഭവത്തിൽ രണ്ട് ഗ്രാമവാസികളെ വനംവകുപ്പ് അറസ്റ്റ് ചെയ്തു. കർജൻ താലൂക്കിലെ ചോർഭുജ് ഗ്രാമത്തിൽ ജനുവരി 17-നായിരുന്നു മനസാക്ഷിയെ ഞെട്ടിച്ച ഈ സംഭവം നടന്നത്.
വിത്തൽ നായക്, ബിപിൻ നായക് എന്നിവരെയാണ് വനംവകുപ്പ് അറസ്റ്റ് ചെയ്തത്. ഇവരെ കർജൻ സബ് ജയിലിലേക്ക് മാറ്റി. ഗ്രാമത്തിലിറങ്ങിയ മുതലയെ പ്രതികൾ വടികൊണ്ട് ക്രൂരമായി അടിച്ചു കൊല്ലുകയായിരുന്നു. മറ്റ് ചിലർ ടോർച്ച് വെളിച്ചം തെളിച്ച് ഇവർക്ക് സഹായം നൽകുന്നതും ദൃശ്യങ്ങളിലുണ്ട്. കൊലപ്പെടുത്തിയ ശേഷം മുതലയുടെ ജഡം ഗ്രാമത്തിലെ കുളത്തിലേക്ക് എറിഞ്ഞു.
1972-ലെ വന്യജീവി സംരക്ഷണ നിയമപ്രകാരമാണ് ഇവർക്കെതിരെ കേസെടുത്തിരിക്കുന്നത്. മൂന്ന് മുതൽ ഏഴ് വർഷം വരെ തടവ് ലഭിക്കാവുന്ന കുറ്റമാണിത്. സംഭവത്തിൽ കൂടുതൽ പേർക്ക് പങ്കുണ്ടോ എന്ന് വനംവകുപ്പ് അന്വേഷിച്ചുവരികയാണ്. പരിക്കേറ്റ മുതലയുടെ പോസ്റ്റ്മോർട്ടം റിപ്പോർട്ട് ലഭിച്ചാലുടൻ കൂടുതൽ വിവരങ്ങൾ വ്യക്തമാകുമെന്ന് റേഞ്ച് ഫോറസ്റ്റ് ഓഫീസർ ജയേഷ് റാത്തോഡ് അറിയിച്ചു.
മൃഗങ്ങൾക്കെതിരെയുള്ള ഇത്തരം അതിക്രമങ്ങൾ തടയാൻ കർശന നിയമനടപടികൾ സ്വീകരിക്കുമെന്ന് അധികൃതർ വ്യക്തമാക്കി.
