എല്ലാവരും ഏറെ ഇഷ്ടപ്പെടുന്ന ഒരു വിഭവമാണ് അപ്പവും മട്ടൺ സ്റ്റൂവും (Mutton Stew). വെളുത്തു മൃദുവായ അപ്പവും, മസാലയും എരിവും ചേരുന്ന സ്റ്റൂവും കൂടിയാകുമ്പോൾ ആഹാ എന്താ കോമ്പിനേഷൻ. ആദ്യം നല്ല പൂപോലത്തെ അപ്പം എങ്ങനെ ഉണ്ടാക്കാമെന്ന് നോക്കാം.
ആവശ്യമായ ചേരുവകൾ
പച്ചരി – 1 1/2 കപ്പ്
തേങ്ങ ചിരകിയത് – 1/2 കപ്പ്
ചോറ് – 3/4 കപ്പ്
യീസ്റ്റ് – 1/2 ടീസ്പൂണ്
പഞ്ചസാര – 3/4 ടേബിള് സ്പൂണ്
തയാറാക്കുന്ന വിധം
പച്ചരി നന്നായി കഴുകി മിനിമം 4 മണിക്കൂര് കുതിര്ത്ത് അരച്ചെടുക്കുക. യീസ്റ്റും പഞ്ചസാരയും കൂടി പച്ചരി അരച്ചതുമായി യോജിപ്പിക്കുക.
അടുത്തതായി തേങ്ങ ചിരകിയതും ചോറും അരച്ചെടുത്ത് അരി അരച്ചതുമായി നന്നായി യോജിപ്പിക്കുക. ഈ കൂട്ട് 6- 8 മണിക്കൂര് മാറ്റി വയ്ക്കുക. അതിനുശേഷം ഉപ്പ് ചേര്ത്ത് നന്നായി ഇളക്കി 1/2 മണിക്കൂര് കൂടി വയ്ക്കുക. ഇപ്പോള് മാവ് നന്നായി പൊങ്ങി വന്നിട്ടുണ്ടാവും.
ഇനി അപ്പച്ചട്ടി ചൂടാക്കി ഓരോ തവി മാവ് വീതം ഒഴിച്ച് ചുറ്റിച്ചതിനുശേഷം ഒരു മിനിറ്റ് സമയം തീ കൂട്ടി വയ്ക്കുക. അപ്പോള് നന്നായി ബബിൾസ് വന്ന് തുടങ്ങും ഈ സമയത്ത് തീ ലോ ഫ്ലേമിലേക്കാക്കി അപ്പം ചുട്ടെടുക്കാം.
ഇനി എങ്ങനെ വളരെ എളുപ്പത്തില് തേങ്ങാപ്പാലില് കുറുകിയ ചാറുള്ള രുചികരമായ മട്ടന് സ്റ്റ്യൂ തയാറാക്കാമെന്ന് നോക്കാം.
ആവശ്യമായ ചേരുവകൾ
മട്ടന് – 1/2 കിലോഗ്രാം
പട്ട – 4-5 ചെറിയ കഷണം
ഏലയ്ക്ക – 8-10 എണ്ണം
ഗ്രാമ്പു – 8-10 എണ്ണം
ഇഞ്ചി -1 ഇഞ്ച് വലിപ്പത്തില്
സവാള – 1
പച്ചമുളക് – 4
കറിവേപ്പില – ആവശ്യത്തിന്
ഉരുളക്കിഴങ്ങ് – 1 ചെറുത്
കാരറ്റ് – 1 ഇടത്തരം
തേങ്ങാപ്പാൽ (രണ്ടാം പാൽ ) – 1 കപ്പ്
തേങ്ങാപ്പാൽ (കട്ടിയുള്ള ഒന്നാംപാൽ ) – 1 കപ്പ്
വെളിച്ചെണ്ണ – 2 ടേബിള് സ്പൂണ്
ഉപ്പ് -ആവശ്യത്തിന്
തയാറാക്കുന്ന വിധം
ആദ്യം മട്ടന്, ഉപ്പ്, പട്ട, ഗ്രാമ്പു, ഏലയ്ക്ക, ഇഞ്ചി ചതച്ചത് കുറച്ച് വെള്ളം എന്നിവ ചേര്ത്ത് പ്രഷർ കുക്കറിൽ 80% വേവിക്കുക. ശേഷം ഒരു പാനില് വെളിച്ചെണ്ണ ചൂടാക്കി അതിലേക്ക് നീളത്തില് അരിഞ്ഞ സവാള, അറ്റം പിളര്ന്ന പച്ചമുളക്, കറിവേപ്പില എന്നിവ ചേര്ത്ത് നിറം മാറാതെ ചെറുതായി വഴറ്റുക. ശേഷം ചെറിയ ചതുര കഷണങ്ങളായി മുറിച്ചെടുത്ത ഉരുളക്കിഴങ്ങും കാരറ്റും വഴറ്റിയ ചേരുവകളും മട്ടനില് ചേർത്തിളക്കി രണ്ടാം പാൽ ഒഴിച്ച് ഒരു വിസില് കൂടി വരുന്നതുവരെ വേവിക്കുക.
അതിനുശേഷം കുക്കർ തുറന്ന് ഇതിലേക്ക് ഒന്നാംപാല് ഒഴിക്കുക. തിളച്ച ശേഷം തീ ഓഫ് ചെയ്യാം. കുറുകിയ ചാറോടു കൂടിയ മട്ടന് സ്റ്റ്യൂ റെഡി.
