അഹമ്മദാബാദ്: ടി20 ലോകകപ്പ് സൂപ്പർ 8-ൽ ദക്ഷിണാഫ്രിക്കയോടേറ്റ കനത്ത തോൽവിക്ക് പിന്നാലെ ഇന്ത്യൻ ബാറ്റിംഗ് നിരയിൽ അഴിച്ചുപണിക്ക് നീക്കം. തുടർച്ചയായ പരാജയങ്ങൾ നേരിടുന്ന ഓപ്പണർ അഭിഷേക് ശർമ്മയ്ക്ക് പകരം മലയാളി താരം സഞ്ജു സാംസണെ പ്ലേയിംഗ് ഇലവനിലേക്ക് തിരികെ കൊണ്ടുവരാൻ ടീം മാനേജ്മെന്റ് ആലോചിക്കുന്നു. അസിസ്റ്റന്റ് കോച്ച് റയാൻ ടെൻ ഡോഷെറ്റാണ് ഇത് സംബന്ധിച്ച സൂചനകൾ നൽകിയത്.(Sanju Samson in the Indian team against Zimbabwe? )
ദക്ഷിണാഫ്രിക്കയ്ക്കെതിരെ 188 റൺസ് പിന്തുടർന്ന ഇന്ത്യ 111 റൺസിന് തകർന്നടിഞ്ഞത് ടീമിന് വലിയ തിരിച്ചടിയായി. ടൂർണമെന്റിലുടനീളം ഇന്ത്യയെ വേട്ടയാടുന്ന ഓപ്പണിംഗ് പ്രതിസന്ധിയാണ് കോച്ച് ചൂണ്ടിക്കാട്ടുന്നത്. ടൂർണമെന്റിൽ ഇന്ത്യ കളിച്ച മിക്ക മത്സരങ്ങളിലും എതിരാളികൾ പാർട്ട് ടൈം ഓഫ് സ്പിന്നർമാരെ വെച്ചാണ് ബൗളിംഗ് തുടങ്ങിയത്. അഭിഷേക് ശർമ്മ ഈ തന്ത്രത്തിൽ വീഴുന്നത് ടീമിനെ സമ്മർദ്ദത്തിലാക്കുന്നതായി ഡോഷെറ്റ് പറഞ്ഞു.
ലോകകപ്പിലെ നാല് ഇന്നിംഗ്സുകളിൽ മൂന്നിലും അഭിഷേക് പൂജ്യത്തിന് പുറത്തായിരുന്നു. നമീബിയക്കെതിരായ മത്സരത്തിൽ 8 പന്തിൽ 22 റൺസുമായി വെടിക്കെട്ട് പ്രകടനം നടത്തിയ സഞ്ജുവിന്റെ സാന്നിധ്യം ടീമിന് ഗുണം ചെയ്യുമെന്ന് മാനേജ്മെന്റ് കരുതുന്നു.
2025-ന് ശേഷം ഓപ്പണറായി ഇറങ്ങിയ 12 ഇന്നിംഗ്സുകളിൽ നിന്ന് 13 ശരാശരിയിൽ 156 റൺസ് മാത്രമാണ് സഞ്ജുവിന് നേടാനായത്. ഈ കണക്കുകൾ മാനേജ്മെന്റിനെ കുഴപ്പിക്കുന്നുണ്ടെങ്കിലും സഞ്ജുവിന്റെ പരിചയസമ്പത്ത് പ്രതീക്ഷയാകുന്നുണ്ട്. സെമി ഫൈനൽ പ്രതീക്ഷകൾ നിലനിർത്താൻ ഫെബ്രുവരി 26-ന് ചെന്നൈയിൽ സിംബാബ്വെക്കെതിരെ നടക്കുന്ന മത്സരം ഇന്ത്യക്ക് ജയിച്ചേ തീരൂ.
