നടക്കാനിരിക്കുന്ന വനിതാ ഏകദിന ലോകകപ്പ്, ഇന്ത്യ നേടണമെങ്കില്‍, വലിയ മത്സരങ്ങളിലെ പ്രധാന അവസരങ്ങള്‍ മുതലെടുത്ത് കളിയുടെ വേഗത തങ്ങള്‍ക്ക് അനുകൂലമാക്കി മാറ്റണമെന്ന് മുന്‍ ക്യാപ്റ്റന്‍ മിതാലി രാജ്. 2005 ലും 2017 ലും ഇന്ത്യയെ ലോകകപ്പ് ഫൈനലിലേക്ക് നയിച്ച ക്യാപ്റ്റനാണ് മിതാലി. അടുത്ത മാസം നടക്കുന്ന ലോകകപ്പില്‍ ഓസ്‌ട്രേലിയയ്ക്കും ഇംഗ്ലണ്ടിനും ഒപ്പം കിരീടം നേടാന്‍ സാധ്യതയുള്ള ടീമുകളായി ആതിഥേയരായ ഇന്ത്യയും മത്സരിക്കും.
വലിയ മത്സരങ്ങളില്‍ ലഭിക്കുന്ന ചെറിയ അവസരങ്ങള്‍ പോലും മുതലെടുക്കണമെന്ന് മിതാലി പറഞ്ഞു. "മത്സരിക്കുന്ന ടീമുകള്‍ക്കിടയില്‍ നിലനില്‍ക്കുന്ന സന്തുലിതാവസ്ഥയാണിത്. കിരീടം നേടുന്നത് രാജ്യത്തെ വനിതാ ക്രിക്കറ്റില്‍ വിപ്ലവകരമായ സ്വാധീനം ചെലുത്തുമെന്ന് ഞാൻ വിശ്വസിക്കുന്നു. അതൊരു വലിയ കാര്യമാകുമെന്ന് ഞാന്‍ കരുതുന്നു. ഞങ്ങള്‍ രണ്ടുതവണ അടുത്തെത്തി, പക്ഷേ ഇതുവരെ കപ്പ് നേടിയിട്ടില്ല. സ്വന്തം നാട്ടില്‍ ലോകകപ്പ് നേടുന്നത് വളരെ മികച്ചതായിരിക്കും, കാരണം ഇത് തികച്ചും വ്യത്യസ്തമായ ഒരു ഘട്ടമാണ്. ഇന്ത്യയുടെ സമീപകാല ഇംഗ്ലണ്ട് പരിമിത ഓവര്‍ പര്യടനത്തില്‍ യുവതാരങ്ങളായ ക്രാന്തി ഗൗഡും ശ്രീ ചരണിയും തങ്ങളുടെ വ്യക്തിമുദ്ര പതിപ്പിച്ചു, ടീം ടി20, ഏകദിന പരമ്പരകള്‍ നേടി." - മിതാലി പറഞ്ഞു.
ഇംഗ്ലണ്ടിലെ ക്രാന്തി ഗൗറിന്റെ പ്രകടനം എന്നെ വളരെയധികം ആകര്‍ഷിച്ചുവെന്ന് മിതാലി പറഞ്ഞു. "ക്രാന്തി വനിതാ പ്രീമിയര്‍ ലീഗ് കളിച്ചിട്ടുണ്ട്, പക്ഷേ അവര്‍ക്ക് വലിയ പരിചയമില്ല. ഇപ്പോള്‍ ഹോം ലോകകപ്പില്‍ അവര്‍ മികച്ച പ്രകടനം കാഴ്ചവയ്ക്കുന്നത് കാണാന്‍ ഞാന്‍ ആഗ്രഹിക്കുന്നു."- മിതാലി പറഞ്ഞു.