'തിരുവനന്തപുരത്ത് ആയിരുന്നു മത്സരം നടത്തേണ്ടിയിരുന്നത്': ലഖ്‌നൗവിലെ ഇന്ത്യ - ദക്ഷിണാഫ്രിക്ക നാലാം ടി20 മത്സരം ഉപേക്ഷിച്ച സംഭവത്തിൽ ശശി തരൂർ | T20I

തിരുവനന്തപുരം : ലഖ്‌നൗവിൽ നടക്കേണ്ടിയിരുന്ന ഇന്ത്യ-ദക്ഷിണാഫ്രിക്ക നാലാം ടി20 മത്സരം കനത്ത മൂടൽമഞ്ഞും വായുമലിനീകരണവും കാരണം ഉപേക്ഷിച്ചതിൽ അതൃപ്തി പ്രകടിപ്പിച്ച് കോൺഗ്രസ് എം.പി ശശി തരൂർ. ശ്വാസം മുട്ടിക്കുന്ന ഉത്തരേന്ത്യൻ നഗരങ്ങൾക്ക് പകരം വായുനിലവാരം മെച്ചപ്പെട്ട തിരുവനന്തപുരത്തായിരുന്നു മത്സരം നടത്തേണ്ടിയിരുന്നതെന്ന് അദ്ദേഹം അഭിപ്രായപ്പെട്ടു. തന്റെ ഔദ്യോഗിക 'എക്സ്' പ്ലാറ്റ്‌ഫോമിലൂടെയായിരുന്നു തരൂരിന്റെ പ്രതികരണം.(The match should have been held in Thiruvananthapuram, Shashi Tharoor on the cancellation of the India-South Africa 4th T20I in Lucknow)

മത്സരം കാണാൻ ആകാംക്ഷയോടെ ഇരുന്ന ക്രിക്കറ്റ് ആരാധകർ വെറുതെ കാത്തിരിക്കേണ്ടി വന്നതിൽ അദ്ദേഹം ഖേദം പ്രകടിപ്പിച്ചു. മിക്ക ഉത്തരേന്ത്യൻ നഗരങ്ങളിലെയും വായു ഗുണനിലവാര സൂചിക (AQI) 411 എന്ന അപകടകരമായ നിലയിലാണെന്ന് തരൂർ ചൂണ്ടിക്കാട്ടി. അതേസമയം, തിരുവനന്തപുരത്തെ വായുനിലവാരം കേവലം 68 മാത്രമാണെന്നും വായു ഗുണനിലവാരം ഇത്രത്തോളം മികച്ചതായ തിരുവനന്തപുരത്ത് മത്സരം ഷെഡ്യൂൾ ചെയ്തിരുന്നെങ്കിൽ ആരാധകർക്ക് ഈ നിരാശ ഉണ്ടാകില്ലായിരുന്നുവെന്നും അദ്ദേഹം കുറിച്ചു.

കനത്ത പുകമഞ്ഞ് കാരണം ലഖ്‌നൗവിലെ ഇക്കാന സ്റ്റേഡിയത്തിൽ കാഴ്ചപരിധി കുറഞ്ഞതാണ് മത്സരം ഉപേക്ഷിക്കാൻ കാരണമായത്. വായുമലിനീകരണം താരങ്ങളുടെ ആരോഗ്യത്തെയും ബാധിക്കുമെന്ന ആശങ്കയും ഉയർന്നിരുന്നു. പരമ്പരയിലെ അഞ്ചാമത്തെയും അവസാനത്തെയും മത്സരം വരാനിരിക്കുന്ന വെള്ളിയാഴ്ച അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടക്കും.