ശ്രീലങ്കൻ ആഭ്യന്തര ക്രിക്കറ്റ് താരം സാലിയ സമന് എല്ലാ ഫോർമാറ്റുകളിൽ നിന്നും അഞ്ച് വർഷത്തേക്ക് വിലക്കേർപ്പെടുത്തി അന്താരാഷ്ട്ര ക്രിക്കറ്റ് കൗൺസിൽ (ഐ.സി.സി). 2021ലെ അബുദാബി ടി10 ലീഗിൽ ഒത്തുകളി, ഗൂഢാലോചന, മത്സരങ്ങൾ അനുചിതമായി സ്വാധീനിക്കാൻ ശ്രമിക്കൽ തുടങ്ങി എമിറേറ്റ്‌സ് ക്രിക്കറ്റ് ബോർഡിന്റെ (ഇ.സി.ബി) അഴിമതി വിരുദ്ധ നിയമം ലംഘിച്ചതിനാണ് താരത്തിനെതിരെ നടപടി. 2023 സെപ്തംബർ 13 മുതൽ താൽക്കാലിക സസ്‌പെൻഷൻ ഉണ്ടായിരുന്ന സമനെ, പൂർണ വാദം കേട്ട ശേഷം ഐ.സി.സി ട്രൈബ്യൂണൽ കുറ്റക്കാരനാണെന്ന് കണ്ടെത്തുകയായിരുന്നു. മറ്റൊരു കളിക്കാരന് പ്രതിഫലം വാഗ്ദാനം ചെയ്തതിനും സമനെതിരെ കുറ്റം ചുമത്തിയിട്ടുണ്ട്.
2023ലെ അബുദാബി ടി10 ലീഗിൽ അഴിമതി വിരുദ്ധ നിയമം ലംഘിച്ചതിന് ആരോപിക്കപ്പെട്ട എട്ട് പേരിൽ സാലിയ സമനും ഉൾപ്പെട്ടിരുന്നു. ഐ.സി.സി പ്രസ്താവനയിൽ, 2023 സെപ്തംബർ 13 മുതൽ വിലക്ക് പ്രാബല്യത്തിൽ വരുമെന്ന് അറിയിച്ചു. സാലിയ സമന്റെ വിലക്ക് ശ്രീലങ്കൻ ക്രിക്കറ്റിന് തിരിച്ചടിയാണ്.
ശ്രീലങ്കൻ ആഭ്യന്തര ക്രിക്കറ്റിൽ ഓൾറൗണ്ടറായി തിളങ്ങിയ താരമാണ് സാലിയ സമൻ. 101 ഫസ്റ്റ് ക്ലാസ് മത്സരങ്ങളിൽ 27.95 ശരാശരിയിൽ 3,662 റൺസ് നേടി, ഇതിൽ 2 സെഞ്ചുറിയും 22 അർധ സെഞ്ചുറിയും ഉൾപ്പെടുന്നു. ഉയർന്ന സ്‌കോർ 129. ബൗളിങിൽ 25.92 ശരാശരിയിൽ 231 വിക്കറ്റുകൾ വീഴ്ത്തി. ആഭ്യന്തര ക്രിക്കറ്റിൽ മികച്ച റെക്കോർഡുള്ള താരത്തിന്റെ കരിയർ ഒത്തുകളി ആരോപണത്തെ തുടർന്ന് അവസാനിക്കുന്നത് ആരാധകർക്കിടയിൽ ഞെട്ടൽ ഉണ്ടാക്കിയിട്ടുണ്ട്. അബുദാബി ടി10 ലീഗിൽ നടന്ന ഒത്തുകളി ആരോപണങ്ങൾ ക്രിക്കറ്റിൽ അഴിമതി വിരുദ്ധ നടപടികളുടെ പ്രാധാന്യം വീണ്ടും എടുത്തുകാട്ടുന്നു. ഐ.സി.സിയുടെ കർശന നടപടികൾ ക്രിക്കറ്റിന്റെ സത്യസന്ധത നിലനിർത്താൻ ലക്ഷ്യമിടുന്നു.