റിയാദ്: ഫുട്ബോൾ ചരിത്രത്തിലെ അവിസ്മരണീയമായ 1000 ഗോൾ എന്ന നാഴികക്കല്ല് താൻ തീർച്ചയായും മറികടക്കുമെന്ന് പോർച്ചുഗീസ് ഇതിഹാസം ക്രിസ്റ്റ്യാനോ റൊണാൾഡോ (Cristiano Ronaldo). ദുബായിൽ നടന്ന ഗ്ലോബ് സോക്കർ അവാർഡ്സിൽ മികച്ച മിഡിൽ ഈസ്റ്റ് താരമായി തിരഞ്ഞെടുക്കപ്പെട്ട ശേഷം സംസാരിക്കുകയായിരുന്നു അദ്ദേഹം. നിലവിൽ 956 ഗോളുകൾ നേടിയിട്ടുള്ള അൽ-നസർ നായകന് ഈ ചരിത്ര നേട്ടത്തിലേക്ക് ഇനി 44 ഗോളുകൾ കൂടി മതി.
പരിക്കുകൾ തടസ്സമായില്ലെങ്കിൽ താൻ തീർച്ചയായും ഈ ലക്ഷ്യത്തിലെത്തുമെന്ന് 40-ാം വയസ്സിലും മികച്ച ഫോമിൽ തുടരുന്ന റൊണാൾഡോ പറഞ്ഞു. "കളിക്കളത്തിൽ തുടരുന്നത് ഏറെ വെല്ലുവിളികൾ നിറഞ്ഞതാണ്, എങ്കിലും അതിനുള്ള ആവേശവും പ്രചോദനവും ഇപ്പോഴും എന്നിലുണ്ട്. ഏഷ്യയിലാണോ യൂറോപ്പിലാണോ കളിക്കുന്നത് എന്നതല്ല കാര്യം, കിരീടങ്ങൾ നേടുകയും എല്ലാവർക്കും അറിയാവുന്ന ആ നാഴികക്കല്ലിൽ (1000 ഗോൾ) എത്തുകയുമാണ് എന്റെ ലക്ഷ്യം," റൊണാൾഡോ വ്യക്തമാക്കി.
റൊണാൾഡോയുടെ ഈ ലക്ഷ്യത്തിന് പൂർണ്ണ പിന്തുണയുമായി പോർച്ചുഗൽ ദേശീയ ടീം പരിശീലകൻ റോബർട്ടോ മാർട്ടിനസും രംഗത്തെത്തി. നിലവിൽ സൗദി പ്രോ ലീഗിൽ അൽ-നസറിനായി മിന്നും പ്രകടനം തുടരുന്ന താരം, കഴിഞ്ഞ മത്സരത്തിൽ നേടിയ ഇരട്ട ഗോളുകളോടെ ടീമിനെ പോയിന്റ് പട്ടികയിൽ ഒന്നാമത് എത്തിച്ചിരുന്നു. താൻ ഇനിയും ഒന്നോ രണ്ടോ വർഷം കൂടി പ്രൊഫഷണൽ ഫുട്ബോളിൽ തുടരുമെന്നും താരം സൂചന നൽകി.
Cristiano Ronaldo has reaffirmed his determination to become the first male player to score 1,000 official career goals, asserting his confidence during the Globe Soccer Awards. With 956 goals already to his name, the 40-year-old Al-Nassr forward believes that staying injury-free is the only requirement to reach the milestone. Portugal coach Roberto Martinez also backed the legend's ambition, noting that Ronaldo's longevity is fueled by his daily passion for the sport.